Tórt túlik mal ósirgen malsaq qaýym azyq-túlik molshylyǵyn jasaýǵa úlesimizdi qossaq deıdi. Oǵan jyl on eki aı beınetin belden keshken bar sharýa nátıjeli bolýy kerek. Iаǵnı mal ónimderi óńdelip, tutynýshylarǵa jetse – eńbekteriniń janǵany.
Bıyl jeti birdeı taýarly sút fermasy uıymdastyrylmaq. Ázirge eki ferma tolyq jumys isteı bastady. Aqkól aýdanynda úsh iri taýarly sút fermasy men bir sharýa qojalyǵy sút óndirip jatyr.
Halyq birdi-ekili mal baqqanymen, ıgiligin kórý qıyn bolyp kelgen. Malsaq qaýym malynyń tólin satyp qana tabys tabatyn. Al saýylǵan sútti ótkizetin jer joq. Endi, mine, táp-táýir tabysqa kenelmek. Aýdandaǵy et óndirýmen aınalysatyn 12 aýyl sharýashylyǵy qurylymy bıyl 296,1 tonna tirideı salmaqta mal tapsyrdy. Qarasaı selolyq okrýginde 2 et baǵytyndaǵy ferma uıymdastyryldy. Eki sharýashylyq óz qarajatyna 75 bas iri qara satyp aldy.
Eńbek selolyq okrýginde taýarly sút fermasynyń qurylysy qolǵa alyndy. Onda 800 bastan astam sıyr saýylmaq. Fermanyń ınjenerlik ınfraqurylymy iske qosylǵan. Elektr qýaty tartylǵan. Sharýashylyq basshylary óz qarajaty esebinen qyrýar is tyndyrypty. Memlekettiń qoldaýy óz aldyna. Jazdyń kúni Danııadan 272 bas golshtın tuqymdy qara mal men shet elden ónimdiligi joǵary taǵy bir tabyn iri qara satylyp alynady. Jumystyń tıimdiligi úshin joǵary sapaly nemis qurylǵylary ornatylǵan.
Taýarly sút fermasynyń jobasy «Aýyl amanaty» baǵdarlamasy boıynsha qolǵa alynyp otyr. Kásiporyn osy baǵdarlama sheńberinde jeńildetilgen nesıe alǵan. Bul da jumys isteımin dep janyp turǵan kásip ıelerine kóp-kórim qoldaý.
Aqmola oblysy,
Aqkól aýdany