Qostanaı oblysy Qamysty aýdanynda «Baýyrsaq fest» atty is-shara uıymdastyryldy. Alpystan astam mekeme birneshe topqa bólinip, oshaq basynda 2 tonnadan asa baýyrsaq pisirdi.
Festıvalda as atasy nannyń alýan túri daıyndaldy. Sondyqtan ár aspaz bilgenin ortaǵa salyp, ózara tájirıbe almasty. «Álemdik rekordty tirkeýge Qostanaı oblysyna Astanadan arnaıy keldik. Buǵan deıingi baýyrsaq rekordy eki tonna 47 kılo bolǵan. Al Qamysty aýdanynyń turǵyndary eki tonna úsh júz kılolyq mejege jetti. Bul – álemdik rekord», dedi Qazaqstan Gınnes rekordtar kitabynyń resmı ókili Qýandyq Qudaıbergenov.
Ushatyn parom
Shvesııa astanasy Stokgolm sýlarynda elektr qýatymen júretin parom qatynaı bastady.
«Kandela» kompanııasy qurastyrǵan elektr keme jyldamdyǵyn saǵatyna 55 shaqyrymǵa deıin arttyra alady. «Jalpy alǵanda jolaýshylar paromdary otyndy kóp tutynady. Al bizdiń tehnologııa arqyly energııa shyǵynyn 75 paıyzǵa únemdeýge bolady. Osylaısha, qalalar arasynda qatynaý ýaqyty da edáýir azaıady. Eń bastysy, qorshaǵan ortaǵa eshqandaı ekologııalyq zalal kelmeıdi», deıdi kompanııa basshysy Gýstav Hasselskog.
Bási joǵary bıtkoın
Bıtkoınnyń baǵasy sharyqtap barady. Sońǵy málimetke qaraǵanda, onyń quny 87 myń dollardan asyp ketken. Bul – buryn-sońdy bolmaǵan rekordtyq kórsetkish.
Osynaý qarqyndy ósimge AQSh-ta Donald Tramptyń bılikke kelýi, sondaı-aq Kongreske bıtkoındy qoldaıtyn kandıdattardyń ótýi sebepshi. Aıta ketý kerek, D.Tramp buǵan deıin Qurama Shtattardy «planetanyń krıpto astanasy» etýge ýáde berdi. «Reıter» agenttiginiń dereginshe, bırjalarda osy valıýtamen baılanysty aksııalar da aıtarlyqtaı qymbattap jatyr.