Taıaýda elimizde sheteldik bankterdiń otandyq naryqqa kirýin jeńildetetin talaptar bekitildi. Jalpy, bul másele Prezıdenttiń naryqqa úsh sheteldik banktiń kelýi týraly aıtqanynan bastaldy. Qarjy naryǵynyń sarapshylary jergilikti naryqqa jańa sheteldik bankterdiń kelýin oń baǵalaıdy.
Qazaqstan qarjygerleri qaýymdastyǵy (QQQ) keńesiniń tóraıymy Elena Bahmýtova otandyq qarjy naryǵynda jańa sheteldik oıynshylardyń paıda bolýy otandyq bıznesti qarjylandyrýdyń qosymsha múmkindikterin ashady dep esepteıdi.
«Jańa bankterdiń kelýi qarjy naryǵyndaǵy básekelestikti kúsheıtedi. Bul bankterdi jańa, neǵurlym yńǵaıly jáne tıimdi qarjylyq sheshimderdi, ónimderdi, qyzmetter men servısterdi ázirleýge ınvestısııa salýǵa yntalandyrady. Qarjylyq qyzmetterdi tutynýshylar, jeke jáne zańdy tulǵalar básekelestikti kúsheıtýden tek paıda kóredi. Sebebi olar ózderi úshin eń tıimdi usynystardy tańdaý múmkindigine ıe bolady», deıdi qaýymdastyq basshysy.
Ekonomıst Marat Abdýrahmanovtyń pikirinshe, iri bankterge úshin bizdiń naryq tar. Damyǵan naryqtardan birneshe shaǵyn qarjy uıymy ǵana kelýge yqylas tanytyp otyrǵan kórinedi.
«Olardyń elde bolýynyń ishki naryqqa áseri az. Jalpy, dál qazir elge aty bar bankter kelse de nesıe saıasatyna áser ete almaıdy, tek qyzmet kórsetý segmentinde ǵana ózgerister engizýi múmkin. Qarjy naryǵyn retteý jáne damytý agenttigi men Ulttyq bank sheteldik bankterdi elge tartý maqsatynda barynsha kompromıstik sheshimderge baryp otyr. Osyǵan deıingi talaptar jeńildedi, keıbiri alyp tastaldy. Sheteldik bankterdi elge tartý ońaı emes ekenin osydan bilýge bolady», deıdi M.Abdýrahmanov.
Osyǵan deıin elge syrttan kelgen bank bizdiń qarjy ınstıtýttaryn jutyp qoıady degen pikir basym bolatyn. Sarapshy bul kózqaras qazir eskirgenin aıtady.
«Bizde áleýeti ishki naryqtan asyp ketken bankter jetedi. Olardyń birazy qyrǵyz ben ózbek naryǵynda óziniń enshiles kompanııasyn ashyp jatyr. Demek, óz bankterimiz qarjy segmentiniń betalysyn basqa baǵytqa aýystyryp jiberýge jol bermeıdi. Tek alpaýyt bankter bizdiń naryqtaǵy bankterdi yǵystyryp shyǵara alady. Biraq ondaılar qazir bizge kelýge asyǵyp otyrǵan joq. Bizge usaq bankter emes, iri bankterdiń kelgeni tıimdi. Tek solar ǵana osy segmentte ashyq básekelestikti qalyptastyrar edi», deıdi ekonomıst.
Úkimet pen Ulttyq banktiń sheteldik ınvestorlardy elge tartý maqsatymen ınvestısııalyq klımatty saýyqtyrýǵa qatysty qabyldaǵan sheshimderi bankterimiz úshin tıimdi deıdi sala mamandary. Sarapshylar báseke tek bankter arasynda emes, onda jumys isteıtin bilikti qyzmetkerler arasynda da júrse quba-qup degen pikirde.