Qazaq poezııasynyń kórnekti ókili, aqyn, Halyq jazýshysy Farıza Ońǵarsynovanyń murasyn perzenti Almas Onǵarsynov elorda tórindegi Ulttyq arhıvtiń qoryna tapsyrdy.
«Mundaı úrdis sońǵy jyldary dástúrge aınaldy. Halqymyzdyń tanymal tulǵalary qujattary men jeke qorynda saqtalǵan qundy jádigerlerin arhıvke ákelip tapsyrady. Bul, bir jaǵynan, mekeme qoryn tolyqtyrsa, ekinshiden – bolashaq urpaqtyń ǵylymı-qoǵamdyq zertteýine qajet bolary anyq», deıdi mekeme basshysy Saǵıla Esimseıitqyzy.
Endigi kezekte bul qatarǵa qazaqtyń aqyn qyzy Farıza Ońǵarsynovanyń murasy qosyldy.
Árbirine jeke-jeke toqtalar bolsaq, kezinde «Jalyn», «Jazýshy» baspasymen jasaǵan kelisimsharttary, óz qolymen jazǵan ómirbaıany, qyzmettik hattary, otbasy shejiresi, oqyrmandary men dostarynan kelgen hattar, ár jyldary túsken foto-sýretteri, óz qalamynan týǵan «Baqyt pen Muń» dramasy, «Kámshat» derekti hıkaıaty, «Jer astyndaǵy teńiz», «Áke úmiti», «Qyz ǵumyry», t.b. týyndylarynyń qoljazba nusqalary bar eken.
Sonymen qatar aýdarmalary, aqyn apamyzdyń shyǵarmashylyǵy haqynda pikir bildirgen: Ǵ.Músirepov, Á.Tájibaev, K.Ahmetova qatarly qalamgerler qoltańbasy, t.b. muralar sóreden oryn aldy.
«Aldaǵy ýaqytta aqyn apamyzdyń tizimge alynǵan muralarynyń ýaqyty anyqtalady hám qujattar sıpatyna (túpnusqa ma, álde kóshirme me) ǵylymı-saraptama jasalady» deıdi arhıv mamandary.