Mańǵystaý oblysyndaǵy aýyzsý tapshylyǵy óńirde qosymsha sý kózderin ashý, ıaǵnı ashy sýdy tushytyp paıdalaný qajettigin tanytty. Osy oraıda sý tushytatyn zaýyttardy salý jobalary qolǵa alyndy. Mańyzdy jobalardyń úsheýi Túpqaraǵan aýdany aýmaǵynda júzege asyp jatyr.
Turǵyndar sanynyń artýyna baılanysty aýdanda mańyzdy áleýmettik nysandar qurylysy da qolǵa alynǵan, solardyń biri – aýdan ortalyǵy Fort-Shevchenko qalasynda, Baýtın, Atash eldi mekenderinde salynyp jatqan sý tushytatyn zaýyttar qurylysy. Atalǵan aýyldarda sýmen qamtamasyz etý maqsatynda táýligine 5000 tekshe metr teńiz sýyn tushytatyn zaýyt salynyp jatyr. Qazirgi ýaqytta zaýyttyń qurylysy 80%-ǵa aıaqtalǵan. Búginde bul eldi mekenderge ashy sý qubyrlary arqyly, al tushy sý jerasty kózderinen arnaıy tasymaldaýshylarmen jetkiziledi. Jyl sońyna deıin zaýyt tolyq iske qosylyp, qubyrlar arqyly tushytylǵan sý turǵyndarǵa berilmek.
Aýdannyń ınfraqurylymyn jaqsartý baǵytyndaǵy taǵy bir mańyzdy joba – táýligine 1000 tekshe metr káriz sýyn tazartýǵa arnalǵan jańa tazartý júıesiniń qurylysy. Bul jobanyń 95%-y aıaqtalyp, jaqyn arada iske qosylady dep josparlanǵan.
Aýdanda áleýmettik nysandar da kóptep boı kóterip jatyr. Bıyl Fort-Shevchenko qalasynda 100 oryndyq jataqhana men 260 oryndyq óner mektebi salynyp jatqany kóńil qýantady. Qazirgi tańda qurylysy 95%-ǵa aıaqtalǵan jataqhana jyl sońyna deıin paıdalanýǵa beriledi. Bul nysan aýdandaǵy tapshy mamandardy qyzmettik páterlermen qamtamasyz etý úshin qarastyrylǵan. Sondaı-aq jalpy aýmaǵy 1,6 gektardy quraıtyn óner mektebiniń qurylysy 85%-ǵa daıyn. Jyl sońyna deıin ashylýy josparlanǵan mektepte balalar men eresekterge arnalǵan mádenıet, óner seksııalary jumys isteıtin bolady.
Úsh aýysymdy oqytýdy joıý, oqý oryndarynyń tapshylyǵyn azaıtý maqsatynda Saıyn Shapaǵatov aýyldyq okrýginde 1200 oryndyq, úsh qabatty zamanaýı mektep qurylysy qarqyndy júrip jatyr. Josparǵa sáıkes, bilim ordasy 2025 jyly paıdalanýǵa beriledi.
Mańǵystaý oblysy,
Túpqaraǵan aýdany