Taıaýda túsime Sheraǵań kirdi.
Men qazir Astanadaǵy «Samal» shaǵyn aýdanynda turamyn. Túsimde syrtqa shyǵyp, ádettegideı úıimizdiń janynda tur ekenmin deımin. Kenet dál aldyma esik pen tórdeı, jarqyraǵan aq mashına kelip tura qaldy. Mashınanyń ishinen Sheraǵanyń júzi kórinip, «Áı, Bolat, beri jaqynda, otyr meniń qasyma» degen daýsy anyq estildi. Qolma-qol shuǵyl qımyldap Sheraǵańnyń janyna baryp otyrdym.
– Meniń alys saparǵa shyǵyp ketkenime de biraz ýaqyt bolypty-aý, – dedi Sheraǵań. – Astanamyz abattana túsipti. Aspanmen talasqan jańa úıler salynypty. Ádemi. Jarasyp tur. Al sóıle, qane. Kórset qalańdy. Men saparǵa shyǵyp ketkeli bolǵan ózgeristerdi.
– Táýelsizdik dańǵylymen júreıik onda, – deımin men.
– Kettik, endeshe, – deıdi Sheraǵa júrgizýshige.
Men onyń kópten beri kórmegen júzine úńile qaraımyn. Esh ózgeris joq. Baıaǵy Sheraǵań. Terezeden kóz almaı qarap otyr.
Ábish Kekilbaıuly men Farıza Ońǵarsynova atyndaǵy kóshelerdi kórgende qýanǵannan janary jarq etkenin baıqap qaldym.
– Durys-aq! Astana óziniń aımańdaıly uldary men qyzdaryn osylaı áspettegeni jón-aq. Qalanyń kórkine kórik qosyp, jarasyp-aq tur, – deıdi Sheraǵań.
Osy sátte bir nárse tars ete qalyp, uıqymnan oıanyp kettim. Oıanǵanyma ókindim. Sóıtsem jubaıym tańerteń demalysqa jolǵa shyǵatynymyzdy eskerip, jıhazdardy ornynan qozǵap, úı ishin tazartyp jýyp júr eken.
Odan ári Sheraǵań túsime qaıtyp enbedi...
Sheraǵań qaıtys bolǵaly da biraz ýaqyt ótken eken-aý dep men oıǵa qaldym. Birden-aq Parlamentte depýtat bolyp júrgendegi Sheraǵańnyń beınesi kóz aldyma qaıta elestedi.
Sheraǵań sóz alǵanda, trıbýnaǵa shyqqanda zal siltideı tyna qalýshy edi ǵoı. Tikeleı efır kezinde Sheraǵańnyń beınesine respýblıkamyzdyń qalalary men dalalaryndaǵy qalyń jurtshylyq, búkil áleýmet ynta qoıyp, kóz tigetinin sezip otyratynbyz. О́ıtkeni Sheraǵań bos sóılemeıtin. Jurtshylyqtyń kókeıindegi ómirsheń, tolǵaqty máselelerdi dál basyp aıtatyn. Sóıtip, qalyń jurtshylyqty oılandyratyn. Tolǵandyratyn.
Sodan oıdy oı qýalap, osydan jetpis jyl buryn, sonaý alysta qalǵan jastyq shaǵymda sol kezdegi elge eń kóp taralatyn «Lenınshil jas» (búgingi «Jas Alash») gazetinde Sheraǵańnyń basshylyǵymen jalyndap-janyp qyzmet atqarǵan jyldarym eriksiz esime tústi.
Mektepti Jambyl oblysynyń Baýyrjan Momyshuly shyqqan Jýaly aýdanynda qazaqsha bitirgen Sheraǵanyń barlyq dárisi oryssha ǵana júretin Máskeý ýnıversıtetiniń jýrnalıstıka fakýltetine oqýǵa qalaı túskeni de bizge jumbaq bolatyn...
Sheraǵańnyń minezinde de aýyldas aǵasy Baýyrjan Momyshulyna uqsastyq bar edi. Ol qaı kezde de qandaı másele bolsyn qaqyratyp shyndyqty ǵana aıtatyn. Ádilet jolynan tanbaıtyn. Bul qasıeti parlamentte depýtat bolyp júrgen kezinde de barynsha aıqyn kórindi. Buǵan óziniń dosy, áriptesi Kamal Smaıylovpen respýblıkamyzdyń aǵa gazeti «Egemen Qazaqstannyń» betinde jarııalanǵan, «Elim, saǵan aıtamyn, Elbasy sen de tyńda» degen aıdarmen berilgen maqalalary kýá.
О́ziniń ómirsheńdigin joǵaltpaǵan, jas urpaqqa beretin tálim-tárbıesi mol sol maqalalar 1998 jyly Almatydaǵy «Qazaqstan» baspasynan kitap bolyp jarııalandy. 3000 dana tırajben basylyp, respýblıkamyzdyń barlyq oblysyndaǵy kitaphanalarǵa taratyldy. Bul kitaptyń elimizdiń órkendeýine qosatyn úlesi, jas urpaqqa da, elimizdegi kókireginde oty bar barlyq azamatqa da tıgizetin shapaǵaty, paıdasy áli de zor.
Endi Sherhan aǵamen qyzmettes bolǵan kezdegi oqıǵalarǵa az-kem toqtalaıyn. Sherhan aǵa «Lenınshil jasta» redaktor bolǵan jyldarda men gazette bólim bastyǵy bolyp isteıtinmin. Onyń aldynda gazettiń Qaraǵandy oblysyndaǵy menshikti tilshisi bolyp birer jyl qyzmet istep qaıtqanmyn. Sodan bir kúni gazettiń jaýapty hatshysy Qaldarbek Naımanbaev «Bilim jáne eńbek» jýrnalyna bas redaktor bolyp aýysty. Qaldarbektiń ornyna endi qaısymyzdy qoıar eken dep barlyq qyzmetker eleńdesip, árqıly áreketterge kóshti. Men redaksııadaǵy eń jasy ári kishi qyzmetker bolǵandyqtan ol orynnan dámelengenim joq. Sonyń aldynda Sheraǵań redaktor bolyp kelgen boıda meni Oqýshy, stýdent-jastar bóliminen jumysy jaýapty ári qaýyrt dep sanalatyn Komsomol turmysy bólimine meńgerýshi etip aýystyrǵan edi.
Sol kúnderdiń birinde, tańerteń, jumys endi bastalyp jatqanda Sheraǵań maǵan: «Bolat, tez kıin de tómenge túse ber», dedi. Basqa eshteńe aıtpady. Men oılanyp kelemin. Búgin onda bıýro otyrysy bolýǵa tıis. Shamasy sol bıýro otyrysynan maǵan materıal daıyndatatyn shyǵar dep paıymdaımyn. Jaǵdaı biraq basqasha bolyp shyqty. Sheraǵań bıýroda men týraly qysqasha baıandady da, «osy qyzmetkerimizdi jaýapty hatshy etip bekitýlerińizdi suraımyn», dep sózin aıaqtady. Sóıtip ózim de, redaksııadaǵy basqa qyzmetkerler de kútpegen jaǵdaıda men gazettiń jaýapty hatshysy bolyp bekip kettim...
Endi bastapqy áńgimeme qaıta oralaıyn.
Joǵaryda aıtqanymdaı, taıaýda túsimde kórgennen keıin men Sheraǵań týraly kóp oılandym. Onyń redaktor retinde qazaq baspasózin damytýǵa, respýblıkamyzdy órkendetýge qosqan úlesi az emes, qomaqty. Elimizge qajetti jýrnalıst kadrlaryn daıarlaýǵa sińirgen eńbegi de orasan zor. Halqymyz óziniń osyndaı aımańdaı uldaryn ornymen baǵalap, olardy keıingi urpaqqa úlgi etip, attaryn kóshelerge, mektepterge berip jatsa – bul qýanarlyq is.
Sondyqtan Sherhan Murtazanyń respýblıkamyzdyń ósip-órkendeýine, óz shyǵarmalarymen, eńbegimen jýrnalıst kadrlaryn, jas urpaqty tárbıeleýge qosqan, keleshekte de qosa beretin úlken úlesine oraı onomastıka komıssııasy, elordanyń jaýapty oryndary Astanadaǵy ortalyq kóshelerdiń birine onyń esimin berýdi keshiktirmeı sheshýi eldik másele dep sanaımyn.
Bolat BODAÝBAI,
jazýshy, Qazaqstannyń eńbek sińirgen qaıratkeri,«Egemen Qazaqstan»-nyń ardageri