Amerıkanyń «Amtrack» poıyzy zýlap keledi. Barar baǵytymyz – Delaware shtatynyń Wilmington qalasy. Qasymda otyrǵan qara jigit óte shydamsyz bolyp shyqty. Aıaqkıimin sheship alyp, terezege qoıyp sýretke túsirdi. Odan keıin qaıta kıip, oryndyqtardy aralap ári-beri júrdi.
Býrna Boı deıtin ánshiniń «Last, last» degen ánin ilesip aıtyp,búkil vagondy basyna kóshirdi. Eshkim úndegen joq. Sálden soń tóbeles izdedi me, qasyma kelip qaıdan kelgenimdi surady. Aıtyp edim, «ondaı memleketti bilmeımin», dep óz sózine ózi kúldi.
Poıyz terezesinen syrtqa kóz saldym. Qarasha sońy bolsa da, dalada syz joq. «10 mınýttan keıin Baltımorǵa jetemiz», dep habarlady. Poıyz beketke toqtaǵan soń, birneshe adam syrtqa shyǵyp, birnesheýi jańa jolaýshy retinde ishke endi. Álgi qara jigit te osy jerde ǵaıyp boldy. «Kurt Vonnegut»-tiń «Mysyqqa arnalǵan besik» atty romanyn oqyp, óz oıymmen ábiger bolyp otyrmyn. Kenet qatarlas oryndaǵy bir kishkene bala mazasyzdanyp jylaı bastady. «Can I play a game?» degendi qaıtalaı berdi. Otyzdyń jýan ishindegi kelinshek «Apple» planshetin sómkesinen sýyryp alyp, ulyna ustatty. Kózin tóńkerip beri qaraǵanda, onyń azııalyq ekenin baıqadym.
«Baltımordan ótip bara jatyrmyn. Keshte qaıtamyn», dep áldekimge dybysty habarlama jibergenimde, ol men jaqqa jalt qarady. Sál únsizdikten keıin «Qazaqstannan keldińiz be?» dep oryssha surady.
– «Yes, I am from Kazakhstan». Biraq oryssha túsinbeımin dep aǵylshynsha sóılep edim, ol sál ezý tartty. Meni qyrsyq bireý dep oılasa kerek. Terezege qarap biraz ýaqyt otyrdy.
«Munda oqısyz ba? Esimińiz kim?» degen suraqtarym onyń oıyn bólip jiberdi. Shyn ba, ótirik pe, Qudaı biledi, esimi Zarına eken. Tynysh otyrmaı ulynyń atyn suradym.
Tergeýshisiz be degendeı bajyraıa qarady da: «Ulymnyń aty Elimaı», dedi.
Qapelimde ne derimdi bilmeı, otyrdym da qaldym. «Kelesi aıaldama Wilmington beketi», dep habarlady. Poıyzdan túsip bara jatyp onymen qoshtastym. Basyn sál ızedi. Elimaı anasynyń tizesine basyn qoıyp pysyldap uıyqtap jatyr. «Amtrack» poıyzy Amerıkanyń soltústik dalasyn betke alyp ketip barady. «Iá, onyń aty Elimaı eken», dedim kúbirlep. Kúbirimdi ózimnen basqa eshkim estigen joq.