Anaý men mynaý sahnanyń eki jaǵynan bir-birine qarama-qarsy shyǵady. О́zderin bir-birine baıqatpaýǵa tyrysady. Júzderinen jaqtyrmaǵandyq, jek kórý nyshany bilinedi.
Bir-birin kórmegensip, buqpantaılap, alysyraqtaǵy mıkrofondarǵa taqap, kezekpe-kezek kúbirlep sóıleı bastaıdy.
Anaý: «Asyǵys kezde saıtandaı sap ete qalǵanyn aıtsańshy. О́zi de bir kók myljyń! Qazir jolyqtyń bar ǵoı, kemi otyz mınýt «tergep zertteıdi». Munyń janynda tergeýshiniń ózi teri ılep tentirep qalady. Túý úrim-butaqty, sonaý qyrdaǵy áke-shesheni qazbalaı surap kórmese de, úıdegi eshkimmen sharýasy joq bópege deıin baryp, «bótelkege úırendi me? Mamasynyń mamasyn surap mazasyn almaı ma?» dep túý atam zamanǵy ishiniń buzylǵanyn surap mezi qylady... О́te shyqsań ǵoı, erteń-aq: «Anaý bastyq bolǵannan saý ma, kóshede qarsy ushyrasyp edik, tanaýyn kóterip tanymady» degen jel sóz sasytyp jiberetini sózsiz... О́zin sýqanym súımeıdi. Qaraqurym qalada kóshe saıyn esendesip, eńiresip jatady. Tanymaıtyny joq. Qashan kórseń balaǵa da, shaǵaǵa da ıilip sálem berip máımóńkelep jatqany... Taǵy ózi ustasa aırylmaıdy... Osal jerdi biledi. Degenmen sharýasyna myǵym, qara basynyń qamyna kelgende Qarabaıyńa qara kórsetpeıdi...»
Mynaý: «E, Anaý, Álip pe? Kergip qalǵan bireý ózi... Sálemińdi salǵyrt alady. Amandasqanymen, hal-jaǵdaı surasqannyń jónin bilmeıdi. Tárbıesi nashar. Kórgensizdiń kók ezýi! Jaqtyrmaı turǵanyn bilsem de burylaıyn. Buryndary anaý sharýany istep bererinde ıilip ıin aǵash, tóselip tósenish bolǵanym bar. Degenmen amandasýǵa tura ma ózi?»
Anaý: «Otqa janbaıtyn, sýǵa batpaıtynnyń ózi. Pysyqaılyǵy myǵym, keregi de bop qalar... E, kózimiz túıisken sııaqty. Endi burylyp ketý yńǵaısyz».
Mynaý: «Kórip qaldy, kóz taıdyrǵanym kórgendik bolmas. Onyń ústine ósýge áli múmkindigi bar dep estigenmin».
* * *
Anaý: «Oý, Áleke, as-sa-laý-maǵa-leı-kúm! Hal-jaǵdaılaryńyz qalaı? Úlken kisiler, úı-ishi, bala-shaǵa, kári-qurtań, shortan, oı, to est, bári-bári aman-esen be? Bulaı kezdesemin dep kim oılaǵan. О́zińizdi sonadaıdan kórip burylyp keldim. Qalaı, jeńgeı, inishek, aıtpaqshy, álgi buzyqtyń ishi tyıylǵan bolar?»
Mynaý: «Aman-esen. О́z jaǵdaı, kelin-bala degendeı. E, ózińdeı inishekterdi kórgende bir jasap qalamyz. Qazir sálem berip, jaǵdaıyńdy suraǵan pendeden artyq jan joq qoı... E, bári baıaǵy kóńil de. Bir-birimizge bólip berip jatqanymyz shamaly, osyndaı esendesip, hal-ahýal surasqanǵa ne jetsin. E, óziń sekildi estııarlar azaıyp bara jatyr emes pe. Amandaspaq túgil, ózińdi ıyǵymen qaǵyp ótip, janyndaǵyǵa: «Anaý jańaǵy bizdiń aýyldyń kók ezýi» dep keketip bara jatqanyn talaı kórgenbiz. Oı, órkeniń óssin, ózińdi kórip bir jasap, sálemińdi alyp, myń jasap qaldym ǵoı ózi...»
Anaý: «E, Áleke, aǵasy bardyń jaǵasy bar degendeı, ózderińizge keziksek, ataly sózderińizdi estisek, biz de bir jasap, mártebemiz ósip máńgirip qalamyz. Toqtap, qolushyńyzdy bergenińizdiń ózi nege turady? Sizdiń istegen jaqsylyǵyńyzdy kelinińiz kók ezýlenip áli aıtyp otyrady. Qonaq etýdiń reti kelmeı qysylyńqyrap júrgenimiz».
Mynaý: «Oqasy joq, úlkendigimizdi bildirip úı kórsetý bizden. Amandyq bolsa aralasamyz áli... Shaqyrysamyz áli... Shartpa-shurt bolamyz áli...»
Anaý: «Onda jaqsy... Habarlasaıyq, jıi-jıi kezdeseıik, retin taýyp suhbattasaıyq, shurqyrasaıyq, qurquldasaıyq».
Mynaý: «Álbette! Qudaı soǵan jetkizsin. Saý bola ǵoı...
* * *
Anaý: «Dámesin, kári qaqpas!.. Qaıter eken desem, «Qudaı soǵan jetkizsin» deýin, sary saıtan! О́zi amandasýdy úırengen eken. E, bizdi de baǵalaı bastaǵany bolar. Qudaı keziktirgennen saqtasyn. Qyzmeti ósse, kóre jatarmyz... Al ázirge mundaı qyzyl kózdi túsimde de kórmeı-aq qoıaıyn».
Mynaý: «Qyzyl sózdi qyzdyrdy-aı kep. О́zińizdi kórsem mártebemiz ósip, bir jasap qalamyz deıdi-aı... Qonaq qylmaq oıy bar! Tapqan eken aqymaqty! Habarlasqyshyn! Kezdespekshilin! Suhbattasqanda ne aıtpaq eken, á? Kórmegenim sen bol! Bir jerden tesip shyǵyp jatsa kóre jatarmyz... Ázirge seni jelkemniń shuqyry kórsin».
Berik SADYR