«Áýeli oı týady. Sosyn sóz shyǵady. Jazylady. Joldanady. Oqylady. Baǵalanady. Tekseriledi. Túzetiledi. Teriledi. Tazartylady. Oqylady. Taǵy túzetiledi. Taǵy oqylady. Qol qoıylady. Bir maqala daıyn boldy. Bir betke osyndaı qansha maqala kerek! Bir nómirge osyndaı qansha bet kerek! Nómir josparlanady. Better maketteledi. Maqalalar betke túsedi. Korrektor oqıdy. Kezekshi redaktor oqıdy. Basshylyq oqıdy. Taǵy túzetiledi. Qysqartylady. Tolyqtyrylady. Bezendiriledi. Qol qoıylady. Baspahanaǵa jiberiledi. Retteledi. Betteledi. Basylady. Tasylady. Poshtaǵa barady. Úıdi-úıge jetkiziledi. Gazet oqyrmannyń qolyna tıedi. Gazettiń bir nómiri!Erteńine bári basynan qaıta bastalady…».
Gazetimizdiń 25 000-nómiri shyqqan kúni jarııalaǵan «Ulttyq rýhtyń ustyny» degen shaǵyn maqalada osylaı degen ekenbiz.
Bas basylymnyń 105 jyldyǵy atalatyn kúni, ıaǵnı 2024 jylǵy 17 jeltoqsanda «Egemen Qazaqstannyń» 30 973 nómiri jaryq kóredi. Bul – biz joǵaryda sanamalap ótken sharýa, gazettiń bir nómirin oqyrman qolyna tıgizý úshin jasalatyn jańaǵydaı qam-qareket ...otyz myń toǵyz júz jetpis úsh ret jasaldy degen sóz. Ne degen eren eńbek! Ne degen jankeshti jumys!
«Egemenniń» el ómirinde alar ornyna sóz de jetpeıdi, baǵa da jetpeıdi. «Ushqyn» atanǵan kezinde de, «Eńbek týy», «Eńbekshil qazaq», «Eńbekshi qazaq», «Sosıaldy Qazaqstan», «Sosıalıstik Qazaqstan» atanǵan kezderinde de el seniminen tabyldy. Aty ózgergende de zaty ózgergen joq. Bul jyldarda gazet Orynbordan da shyqty, Qyzylordadan da shyqty, Almatydan da shyqty, Astanadan da shyqty. Qaıdan shyqqanda da oıdan shyqty. 105 jyldyq osynaý tarıhynda «Egemen» qashanda elmen birge tynystady, elmen birge qýardy, elmen birge qýandy, onyń sarǵaıǵan betterinde kórmegeni joq halqymyzdyń shynshyl shejiresi saırap jatyr, bas basylymnyń ózine ejelden tán ornyqty oılaý, sabyrly sóıleý, tereńnen tolǵaný sııaqty qasıetteri jaınap jatyr.
Mine, bir ǵasyrdan astam ýaqyttan beri bul gazet bizdiń halqymyzdyń jan serigi bolyp keledi. Jıyrmasynshy, otyzynshy jyldardaǵy jańa ómir qurý jantalasy, qyrqynshy jyldardaǵy qyrǵyn soǵystyń jańǵyryǵy, elýinshi, alpysynshy jyldardaǵy tyń ıgerý, alyp qurylys aýqymy, odan keıingi kezeńdegi halyqtyń tynys-tirshiligi osy gazettiń betinen barynsha kemel kórinip, basylym tigindilerinde Qazaq eliniń talaıly tarıhy túzildi. О́tken ǵasyrdyń 90-jyldaryndaǵy gazet eńbegi tipti eresen. Sheraǵań – qazaqtyń Sherhan Murtazasy basqarǵan jyldarda bul basylym egemendik ıdeıasyn eń aldymen kóterdi. Dalamyzdyń danagóıi – Ábish Kekilbaev basqarǵan kezeńde – Táýelsizdik tabaldyryǵyndaǵy zaman ózgerip, qoǵam ózgerip, adam ózgerip jatqan jaýapty shaqta jarııalanǵan maqalalar oqyrmandy kúrdeli qubylystardyń mánin tereń paıymdaýǵa úıretti. Naryq jetip, talaı nárseden paryq ketip jatqan ana bir jyldarda da qaıtkende oqylýdy, qaıtkende taralýdy ǵana kúıttemedi, qazaqtyń qasıetti sóziniń qadirin qashyrmady, alash balasyn arzan sózben aldarqatpady, qaıta namysyn qamshylap, jańa zamannyń, jańa qoǵamnyń qatań synaǵyna daıyndady.
Kún saıyn árip túzetken, tún saıyn qarip kúzetken jýrnalıstik jumys janyńdy jep jiberetinine, aılar emes, jyldar boıy úıge keshki saǵat on birden esh erte jete almaıtynyńa, keıde redaksııa ǵımaratynan túnniń bir ýaǵynda, keıde tipti atqan tańmen birge shyǵyp bara jatatynyńa qaramaı, osy jasap jatqan jumysymyz erteń myń-myńdaǵan adamdardyń aldyna tartylady-aý, olar osy arqyly elimizdiń tynys-tirshiligi týraly oı túıedi-aý, osy jazylǵandarǵa qarap oılanady-aý, tolǵanady-aý degendi sezinýdiń ózi jigerińdi janyp, qajyryńdy qaırap salatyn. Sol jyldardaǵy jumysymyz jaqsy jemisin de berdi: 2000 jyly 38 myń danamen taraǵan gazettiń taralymy 2016 jyly 212 myńǵa jetti, ıaǵnı bes jarym ese ósti. Sapalyq turǵydan da sony serpilis jasap, el gazeti degen atty ıelendi, eldiktiń bir belgisine aınaldy. Muny dáıim maqtanysh etip ótemiz. Ujym qyzmetkerleriniń turmystyq jaǵdaıyn jasaý da udaıy oıda turdy. 2016 jyly «Egemen Qazaqstan» qyzmetkerleriniń arasynda basynda baspanasy joq birde bir adam qalmaǵan edi. Úı alyp bere almaǵandarǵa jataqhana salyp bergen bolatynbyz. Redaksııanyń segiz qabattyq záýlim ǵımaraty da sol jyldary turǵyzyldy. Sol orynǵa búginde eki redaksııa syıyp otyr.
Osy basylymnyń basshysy bolý turmaq, qosshysy bolǵan jyldarymda da ózim ómirimdegi baıandy bir baqytym qazaqtyń bas gazetinde qyzmet etetinim dep sanaıtynmyn. Bul basylymnyń tizginin ár jyldary Smaǵul Sádýaqasuly, Júsipbek Aımaýytuly, Muhtar Áýezov, Beıimbet Maılın, Sáken Seıfýllın, Turar Rysqulov, Oraz Jandosov, Ǵabıt Músirepov, Sherhan Murtaza, Ábish Kekilbaev syndy qazaqtyń nebir jaqsysy men jaısańy ustaǵan. Sol qasıetti joldy jalǵastyrý baqytyn buıyrtqan taǵdyryma táýbe deımin. Bul sózim – júregimdi jaryp shyqqan jan syrym. Basylymnyń ǵasyrlyq toıy tusyndaǵy suhbatymyzdyń taqyrybyna shyǵarylǵan «Azamat etken «Egemen», ardaqtamaıyn nege men?» degen sózimdi qaıtalaı aıtamyn.
Qazir de qalamdy qoldan tastamaı, bas basylymnyń bir avtory bolyp júrgenimizdi abyroı kóremiz. Altyn uıadaı ardaqty da aıaýly ujymdaǵy ár qyzmetkerge de, osy gazettiń ár avtoryna da, qara shańyraqtyń qasıetin qasterlegen ár oqyrmanǵa da jaqsylyq, qýanysh, sáttilik, tabys tileımiz.
Saýytbek ABDRAHMANOV,
«Egemen Qazaqstan» respýblıkalyq gazeti» AQ 2000–2016 jyldardaǵy prezıdenti,
Memlekettik syılyqtyń laýreaty