Balqash aýdanyndaǵy halyqtyń úshten birin quraıtyn jastardyń jan-jaqty damýyna, bos ýaqytyn tıimdi ótkizýine jáne qajetti aqparat alýyna múmkindik jasaıtyn jastarǵa arnalǵan zamanaýı kovorkıng ortalyǵynyń ashylýyn aýdan jastary kópten kútti. Jaqynda bul maqsat júzege asty.
Ýaqyt talabyna saı boı kótergen ortalyqta jastarǵa bilikti mamandar psıhologııalyq jáne zańgerlik kómek beredi. Jańa ortalyqta qarjylyq saýat boıynsha keńester usynylady. Sondaı-aq jumysqa ornalasýǵa qoldaý kórsetiletini kóptiń kóńilin ósirdi. Endi aýdan jastary bul máselelerdi esh qıyndyqsyz sheshýge múmkindik alǵany aqıqat.
Jalpy, jastar ortalyqtarynyń ashylýy Almaty oblysynda jyl basynan beri qarqyndy damyp keledi. Buǵan deıin Qonaev qalasy men Kegen aýdanynda osyndaı ortalyqtar iske qosylsa, jeltoqsan aıynda Raıymbek aýdanynda taǵy bir ortalyq ashylmaq. Al kelesi jyly Qaskeleń qalasynda jańa ortalyqtyń qurylysyn bastaý josparlanyp otyr.
«Qazirgi tańda Almaty oblysynda 14 pen 35 jas aralyǵyndaǵy 420 myńnan asa jas bar. Buryn jastarǵa arnalǵan, qıyn kezde kómek kórsetip, bas qosatyn ortalyqtar bolmaǵan edi. Biz bul máseleni kezeń-kezeńimen sheship jatyrmyz. Aldaǵy ýaqytta oblystyń barlyq aýdanynda jastar úshin zamanaýı ınfraqurylym qurýdy josparlap otyrmyz. Bul jastarmen júıeli jumys júrgizýge múmkindik beredi», deıdi oblystyq Jastar saıasaty máseleleri basqarmasynyń basshysy Mádı Ahmetov.
Kovorkıng ortalyqtary óńir jastaryn áleýmettendirýdiń mańyzdy alańyna aınalyp keledi. Munda bıznes-trenıngter, sheberlik sabaqtary, kórmeler, kezdesýler men túrli úıirmeler tegin ótkiziledi.
Qonaev qalasy men Kegen aýdanynda ashylǵan ortalyqtarda jyl basynan beri 9 myńnan asa jasty qamtyǵan 700-ge jýyq is-shara uıymdastyrylǵan. Sharalar negizinen ıntellektýaldy, IT jáne kreatıvti salalarǵa baǵyttalǵan. Sondaı-aq bul ortalyqtarda bıznes jeli qurý boıynsha kezdesýler, tanymal tulǵalarmen suhbattar jáne sheberlik sabaqtary ótkizilip keledi.
Balqash aýdanynda ashylǵan jańa ortalyq osy baǵyttaǵy jumystardy jalǵastyra otyryp, jastardyń áleýetin arttyrýǵa yqpal etedi.
Almaty oblysy