Halyqtyń áleýmettik osal tobyna jatatyn elorda aýla klýbtarynyń tárbıelenýshileri «Dınamo» aýla klýbynda ótken jańajyldyq keshke qatysty.
Kesh barysynda jyl qorytyndylandy. Bıyl erekshelengen sportshylarǵa qurmet kórsetildi. Olar baǵaly syılyqtarmen marapattaldy. El chempıondary men túrli respýblıkalyq baıqaýlardyń jeńimpazdary da maqtaý, marapattan qur qalmady. Merekelik baǵdarlamaǵa jas sportshylardyń ata-analary men bapkerleri de qatysty. Sport pen deneshynyqtyrýdy damytýǵa qosqan úlesteri úshin alǵyshattar tabystalyp, syılyq úlestirildi. Kórermen kadet synybynyń qoıylymdaryn tamashalady. «Dınamo» aýla klýbynyń qyzmetkerleri men jas qatysýshylar konserttik baǵdarlamada bar ónerin ortaǵa saldy.
Merekelik keshke kelgen qala ákimdiginiń «Astana jastary» jastar resýrstyq ortalyǵy aýla klýbtaryn damytý bóliminiń basshysy Oljas Hamıtov, aýla klýbynyń jastarǵa bereri mol ekenin aıtty.
«Astana qalasy ákimdiginiń «Astana jastary» jastar resýrstyq ortalyǵy jáne qalalyq Polısııa departamenti jastar men búldirshinderge, qaladaǵy aýla klýbtarynyń tárbıelenýshilerine jańa jyldyq mereke ótkizýdi uıǵardy. Búgin mine, jyl boıy kózge túsken, túrli dodalarda daralanǵan úzdikterdi jeke marapattadyq. Negizi «Dınamo» aýla klýby bul sportpen shuǵyldanatyn oryn ǵana emes, áleýmettik daǵdyny damytatyn úlken orta sanalady. Mysaly, munda robottehnıka, taýǵa órmeleý jáne nysana kózdeý sııaqty úıirmeler de bar», deıdi O.Hamıtov.
Iá, aýla klýbynda kámeletke tolmaǵandar isi boıynsha ınspeksııasynyń esebinde turǵan jasóspirimder de shynyǵyp, salaýatty ómir saltyn ustanady eken. Búginde klýb qarap qalmaı, birneshe federasııamen yntymaqtastyq ornatqan. Osy arqyly alda bolashaǵynan kóp úmit kúttiretin jastardyń sheberligi shyńdalady desedi.
Jańa jyl keshinde «Dınamo» deneshynyqtyrý jáne sporttyq qoǵamynyń tárbıelenýshisi Ádemi Jalǵasbaeva sporttaǵy úzdik nátıjeleri úshin syı-qurmetke bólenip, marapattaldy.
«Thekvondomen 10 jyldan beri shuǵyldanamyn. Qara belbeý ekinshi dan ıegerimin. Sportqa baýlyp, jeńiske jetýime sebepshi bolyp júrgen bapkerime alǵys aıtamyn. «Dınamo» sport klýby búgin bizdi marapattap, mereıimizdi asyrdy. Bıylǵy sport jylynda jaǵymdy jańalyq kóp eken. Mysaly, «Dınamo» aýla klýbynyń 5 tárbıelenýshisi thekvondodan ulttyq qurama sapyna alyndy. Árıne, bul biz úshin úlken qýanysh», deıdi thekvondoshy qyz Ádemi Jalǵasbaeva.
Qazirde aýla klýbynda shynyǵyp júrgen órenderdi arasynda boks jáne qoıan-qoltyq urystan sport sheberleri men sport sheberligine úmitkerler bar. Jalpy mundaǵy 12 úıirmege 500-ge jýyq bala qatynasa, onyń ishinde 120 bala sportqa tegin qatysady. Sport klýbyndaǵy jastar men jasóspirimder keler jyly da mol tabysqa jetip, jeńimpazdardyń mereıi ústem bolsyn deımiz.