«Qazaqstan halqyna» qory – Úkimettiń nemese ózge de memlekettik organnyń enshisinde emes, Prezıdent aıtqandaı, halyqtyq qor. Sırek kezdesetin aýrýǵa shaldyqqan balalardyń em-domyna kómek kórsetýge, qalalarda, aýdandarda, kentterde, aýyldarda balalarǵa arnalǵan sport nysandaryn salýǵa, qabiletti balalardyń talabyn ushtap, shyńdaýǵa, ózge de salaǵa qolǵabys etip keledi.
Úsh jyl ishinde «Qazaqstan halqyna» qory jalpy somasy 230 mlrd teńgege 103 qaıyrymdylyq baǵdarlamasy men jobasyn iske asyrý týraly sheshim qabyldap, onyń ishinde 58 joba aıaqtaldy. Qor jobalary densaýlyq saqtaý, bilim berý, áleýmettik qoldaý, mádenıet, sport, tótenshe jaǵdaılar kezinde kómek kórsetý salasyndaǵy baǵdarlamalardy qosa alǵanda, halyqtyń ómir súrý sapasyn jaqsartýǵa baǵyttalyp otyr.
Qor qarjysyn basqarýdyń negizgi qaǵıdattary – ashyqtyq, esep berý, legıtımdilik hám turaqtylyq. Byltyrǵy qorytyndy kórsetkishterge «Úlken tórttikten» (Ernst&Young) aýdıtordy tarta otyryp, syrtqy aýdıt júrgizilgen.
Densaýlyq saqtaý salasynda 29 baǵdarlama men joba bar. Bul salada kómektiń negizgi úsh baǵytyna – ınnovasııalyq nysanaly dárilik zattardy satyp alýǵa, úzdik álemdik óndirýshilerden zamanaýı jabdyqtarmen jabdyqtaýǵa, jańa tehnologııalardy transfertteý maqsatynda dárigerler men mamandardy oqytýǵa basymdyq beriledi.
Jumystyń mańyzdy baǵyty dep aýyr, orfandyq aýrýlary bar pasıentterge dárilik preparattardy satyp alýdy aıtýǵa bolady. 461 otandasymyz, onyń ishinde 342 balaǵa 57,7 mlrd teńge somasyna 38 dári satyp alyndy. Byltyrǵy qarasha aıynan bastap Qor onkologııalyq, onkogematologııalyq aýrýlary bar 1230 azamatty 14,5 mlrd teńgeden astam somaǵa ınnovasııalyq nysanaly preparatpen qamtamasyz etti. Onkologııalyq qyzmetti damytý úshin 2023-2024 jyldary 5 óńirge arnalǵan jelilik elektrondy údetkishter, kompıýterlik tomograftar, navıgasııalyq júıeler satyp alyndy. Balalar neırohırýrgııalyq qyzmetin damytý sheńberinde 19 óńirde 22 medısınalyq uıym arnaıy jabdyqpen qamtamasyz etildi Almaty, Qyzylorda, Aqtóbe oblystarynda shalǵaı aýyldarda onkologııalyq skrınıng júrgizýge arnalǵan jyljymaly medısınalyq keshender jumys isteıdi. Aýrýlardy erte anyqtaý, balalardyń múgedektiginiń aldyn alýǵa erte aralasýdyń 10 ortalyǵy ashyldy, taǵy úsh ortalyq ashý jónindegi jumys júrgizilip jatyr. Donorlyq móldir qabyqty aýystyryp ornalastyrýdy qajet etetin 209 pasıentke qaıyrymdylyq kómek kórsetildi. Operasııalar «S.Asfendııarov atyndaǵy QazUMÝ» KeAQ ýnıversıtet klınıkasynda júrgiziledi. Sondaı-aq dárigerler men mamandardy oqytý sheńberinde jańa tehnologııalardy elimizge transfertteý maqsatynda transplantasııalyq úılestirýshilerdi, medısınalyq genetıkterdi, ýltradybystyq dıagnostıka mamandaryn oqytýǵa da qomaqty qarajat bólindi.
Áleýmettik qoldaý salasynda ońaltý ortalyqtaryn jabdyqtaýǵa aýtızmi, basqa da mentaldy buzylýlary bar balalarǵa arnalǵan ortalyqtardy jabdyqtaýǵa; balalar men jastardy ınnovasııalyq protezdik-ortopedııalyq buıymdarmen, ekzoqańqalarmen qamtamasyz etýge; múmkindigi shekteýli balalar men jasóspirimderdiń ómir súrý sapasyn jaqsartýǵa baǵyttalǵan 30 baǵdarlama hám joba júzege asty. Aýtızmi, basqa da mentaldy buzylýy bar balalarǵa arnalǵan barlyǵy 7 ortalyq, 3 oblystyq ońaltý ortalyǵy, 3 aýdandyq ońaltý ortalyǵy ashyldy. Taǵy 20 ortalyqty ashý jumysy júrgizilip jatyr. Munyń syrtynda 150 adam ınnovasııalyq protezdermen qamtamasyz etilgen. Elimizdiń 8 óńirinde múmkindigi shekteýli balalar men jasóspirimderge arnalǵan «Tusaý keser» dene shynyqtyrý-saýyqtyrý úıirmeleri jumys isteıdi.
Bilim salasynda 19 baǵytta baǵdarlama men joba túzilgen. Aýyldyq jerlerde tirek mektepterdiń áleýetin damytý jobasy aýmaqtyq, áleýmettik-ekonomıkalyq belgiler boıynsha bilim sapasynyń alshaqtyǵyn qysqartýǵa, materıaldyq-tehnıkalyq bazany jaqsartýǵa, aýyldyq jerlerde oqýshylar úshin sapaly bilimniń qoljetimdiligin qamtamasyz etýge baǵyttalyp, nátıjesinde 135 aýyldyq mektep qamtyldy. «Bilim-ınnovasııa» lıseıleriniń tájirıbesin engizý jobasy sheńberinde Almaty oblysynyń 50 mektebinde 150 fızıka, hımııa, bıologııa kabınetteri jabdyqtaldy. Qaraǵandy oblysynda 86 mektepte «Bilim-ınnovasııa» lıseıleriniń tájirıbesin engizý jobasy boıynsha fızıka, hımııa, bıologııa baǵytynda 253 kabınet jabdyqtalǵan. Jobanyń maqsaty – pedagogterdiń biliktiligin arttyrý, mentorlyq súıemeldeý, bilim berý ınfraqurylymyn qurý arqyly oqýshylardyń bilim deńgeıin arttyrý. 99 arnaýly bilim berý mektep uıymyna bilim alýǵa teń qoljetimdilikti, olardyń erekshelikterine, psıhıkalyq, fızıkalyq múmkindikterine qaramastan, barlyq balalardyń damýynda jetistikke jetýine qajetti materıaldyq-tehnıkalyq bazany nyǵaıtý jóninde júıeli kómek kórsetildi. Aqtóbe oblysynyń shaǵyn jınaqtalǵan aýyldyq mektepteriniń áleýetin damytý jobasy sheńberinde sıfrlyq tehnologııa arqyly 134 mekteptiń materıaldyq-tehnıkalyq bazasy jańartylyp, oqytýdyń 4 modeli engizildi. №1 Hromtaý orta mektebi aýyldyq tirek mektepterin damytý baǵdarlamasy sheńberinde jańǵyrtyldy, sondaı-aq Aqtóbedegi oblystyq perınataldyq ortalyq oftalmologııalyq skrınıng, shala týylǵan nárestelerdiń retınopatııasyn emdeýge arnalǵan jabdyqpen jabdyqtaldy.
«Qazaqstan halqyna» QQ bilim berý granttaryn 2022-2024 oqý jylynda 3003 stýdent pen talapker aldy. Budan bólek, Qor shaǵyn qalalar, aýyldardaǵy 360 mektepte robottehnıka kabınetterin jabdyqtaý jónindegi qaıyrymdylyq baǵdarlamasyn iske asyrdy.
Sport, mádenıet salasynda júzege asqan baǵdarlamalar men jobalar sany – 12. Batys Qazaqstan oblysynda «Jaña club» komıýnıtı-ortalyqtarynda 25 kitaphana jańǵyrtý júrgiziledi. Alǵashqy eki komıýnıtı-ortalyq 16 jeltoqsanda ashyldy.
Shalǵaı eldi mekenderde sportpen aınalysýǵa arnalǵan zaldardyń jetispeýshiligi men qoljetimsizdigin eskere otyryp, Qordyń qoldaýymen aýyldy jerlerde 89 sport zaly ashyldy, jyl sońyna deıin taǵy 11 zal ashylady.
Aýyldyq jerlerde, shaǵyn qalalarda 40 angar tıpti sport zaldaryn salý josparlanyp otyr. 4 nysan paıdalanýǵa berildi.
Tótenshe jaǵdaılar kezinde kómek kórsetý boıynsha 13 joba iske asyryldy. Qor sý tasqyny saldarynan zardap shekken otbasylar úshin 5 óńirde 627 úı qurylysyna qarjy bólindi.