Sý jańa jyldyń tuńǵysh ári biregeı jańalyǵy – «Keleshek» jobasynyń iske qosylýy. Muny Memleket basshysynyń ózi «Keleshek» memlekettik bilim berý jınaqtaý júıesi týraly» zańǵa qol qoıyp, rastady. Júıege 5-18 jas aralyǵyndaǵy balalar qatysady.
Bul ózi ne júıe? Tártibi qandaı? Qysqa-nusqa tanystyraıyq.
Áýeli memleketten bastapqy bilim berý kapıtaly (BBK) retinde 235 920 (60 AEK) teńge birjolǵy tólem túsedi. Áleýmettik osal top balalaryna 471 840 teńge esepteledi. Biraq shot bala 5 jasta kezinde (6 jasqa tolyp ketpeı turyp) ashylýy kerek. Sonymen qatar qoldanystaǵy bilim berý jınaqtaýshy saqtandyrý shartynyń bolýy da eskeriledi. Bala 18 jasqa tolǵan soń jınaq júıesindegi saqtandyrý kompanııasynan jınaqtalǵan qarajat pen Ulttyq qorda jınaqtalǵan barlyq jınaqty biriktirip, tańdaǵan joǵary oqý ornynyń oqý aqysyn tóleı alady.
Júıege qatysý úshin ekinshi deńgeıli bank pen saqtandyrý kompanııasyna baryp, bilim berý jınaqtaýshy saqtandyrý shartyn jasasý qajet. Bul rette ata-ana jınaǵynan bólek, memleketten jyl saıynǵy syıaqy jáne saqtandyrý uıymynan kepildendirilgen ınvestısııalyq kiris esepteledi. Shart jasasý úshin ata-ananyń jeke basyn kýálandyratyn qujat jáne balanyń týý týraly kýáligi usynylady. Eskeretin jaıt – maqalanyń basynda aıtylǵan memlekettik bastapqy bilim berý kapıtaly tek aqsha salynyp otyrǵan jáne 2025 jyly 5 jasqa tolǵan balalardyń esepshotyna túsedi. Al esepshotqa jyl saıyn ata-ana tarapynan eń kemi 94 368 teńge (24 AEK) túsýge tıis. Eger jyl saıyn toltyrylmasa, memleket qarjyny qaıtaryp alady. Sondaı-aq bala azamattyǵyn aýystyrsa nemese basqa elge qonys aýdarsa da qarajat keri qaıtarylady.
Jyl saıynǵy memlekettik syılyqaqy mólsherlemesi – 5%. Halyqtyń áleýmettik osal toptarynyń balalary úshin – 7%. Júıeniń negizgi maqsaty – ártúrli kózden (ata-ana, saqtandyrý kompanııasy, memleket) túsetin qarajatty biryńǵaı jınaqtaýshy júıesine jınaqtaý jáne ár bala joǵary oqý ornyna túsý jasyna qaraı joǵary bilim alýdy qoljetimdi etý.
«Keleshek» salymdary boıynsha ekinshi deńgeıli bankter 11%-dan tómen emes mólsherlememen syıaqy berýge tıis. Eger bala grantqa oqýǵa tússe onda jınalǵan qarjyny ekinshi joǵary bilim alý; baspana satyp alý nemese jóndeý; qarjyny QR úshinshi tulǵasyna aýdarý; jınaqtaýdy jalǵastyrý; aqshany sheship alý (bilimi týraly qujatty usyna otyryp) maqsatynda jaratýǵa quqyly.
Baǵdarlama 2025 jyldyń 1 naýryzynda iske qosylady.