Jambyl aýdanyndaǵy «Baqsy» saýyqtyrý kesheninde bokstan jastar arasynda Almaty oblysynyń chempıonaty ótti. Jarysqa óńirdiń 8 aýdany men Qonaev qalasynan 2011–2012 jyly týǵan jas sportshylar qatysty. Barlyǵy 9 komanda, 220-dan asa sportshy ózara baq synasty. Olar 16 salmaq dárejesinde qolǵap túıistirip, 32 medal jıyntyǵyn sarapqa saldy.
«Birinshilik óńirde bokstyń damý qarqyny anaǵurlym artqanyn ańǵartty. Ári sportty jańa bastaǵan boksshylardy qanattandyra tústi. Búgingi jarys nátıjesinde qańtardyń sońǵy aptasynda Qostanaı oblysynda ótetin elimizdiń chempıonatyna qatysýǵa Almaty oblysynyń úzdik boksshylary irikteledi. Sondyqtan bilekti de júrekti jas sportshylarymyzǵa sáttilik tileımiz», – dedi jarystyń bas tóreshisi Tilek Manap.
Bes kúnge sozylǵan jarystyń qorytyndysynda Eńbekshiqazaq aýdanynyń ókilderi Kamıl Ahmedov, Erasyl Máýlı, Naıl Ahmedov, Tamerlan Sman, Álıhan Islamov, Ile aýdanynyń boksshylary Aıqyn Nurlybek, Ámir Nurbolat, Nurjan Janúsip, Murat Keńesbaı, Nurasyl Hasan, Qarasaı aýdanynan Aıbek Álimqul, Nurdáýlet Sákenov, Jambyl aýdanynan Álıhan Smaǵul, talǵarlyq Aıbyn Májıt, Qonaev qalasynan qatysqan Maǵjan Sháriphan, Raıymbek aýdanynyń bylǵary qolǵap sheberi Álıhan Bekbosyn úzdik dep tanyldy. Jeńimpaz jastar aldaǵy respýblıkalyq básekede oblystyń namysyn qorǵaıdy.
Almaty oblysy