Baspana máselesi qaraldy

Keńeske О́nerkásip jáne qurylys, Ulttyq ekonomıka, Qarjy mınıstrlikteriniń, «Otbasy bank» AQ, «Samuryq-Qazyna» UÁQ» AQ, «Báıterek» UBH» AQ basshylyǵy qatysty.

«Otbasy bankin» damý ınstıtýtyna aınaldyrý jáne salany odan ári damytý úshin jeke qarajatty tartý jónindegi jumysty jandandyrý tásilderi, sondaı-aq jeńildikti baǵdarlamalardy qarjylandyrý, onyń ishinde ónerkásip kásiporyndary qyzmetkerlerin qoldaý jáne jańa ónimderdi shyǵarý bo­ıynsha usynystar talqylandy. Búginde «Qarajanbasmunaı», «Shubarkól kómir», «Eýroazııattyq energetıkalyq korporasııa», «SSKО́B», «Qazhrom» TUK», «Qazaqstan alıýmınııi», «Qazaqstan elektrolız zaýyty» sııaqty iri kásiporyndar jáne basqa da uıymdarmen jumysshy kásip mamandary otbasylarynyń turmysyn jaqsartý jumystary bastaldy.

Premer-mınıstr «Jumysshy maman­dyqtary jyly» aıasynda tehnıkalyq maman­darǵa arnalǵan ıpotekalyq jáne jalǵa beriletin jeńildikti turǵyn úı baǵdarlamasyn keńeıtý qajettigin atap ótti. Banktiń transformasııasy onyń «bir tereze» qaǵıdaty boıynsha muqtaj azamattardy baspanamen qamtamasyz etý jumysyn kúsheıtýge jáne jalpy alǵanda elimizdiń ekonomıkasyn damytýǵa baǵyttalǵan.

О́nerkásip jáne qurylys mınıstrligi­niń derekteri boıynsha, 2024 jyldyń qory­tyndysynda elimizde rekordtyq 18,9 mln sharshy metr turǵyn úı paıdalanýǵa berildi, bul ót­ken jylmen salystyrǵanda 6,4%-ǵa artyq. Sala­nyń naqty kólem ındeksi bir jylda 113,1%-dy qu­rady. 2029 jylǵa qaraı 111 mln sharshy metrge jetkizý jónindegi Prezıdent qoıǵan mindetterdi oryndaý boıynsha jumys júrgizilip jatyr.

Memlekettik qoldaý sharalary sheńberinde azamattarǵa jalǵa beriletin, nesıelik baspana­men qamtamasyz etetin, «2-10-20», «5-10-20» jáne basqa da baǵdarlamalar iske asyrylyp jatyr. 2024 jyly «Otbasy banki» 1,29 trln teńge somasynda 71 452 nesıe berdi, onyń 39,8%-y bastapqy turǵyn úı satyp alýǵa arnalǵan. «Otaý» jáne «Naýryz» baǵdarlamalary bo­ıynsha jalpy 251,9 mlrd teńgege 10 003 qaryz berildi.