«Mary mereıi»

Byltyr Qazanda ótken TÚRSKOI turaqty keńesiniń 32-shi otyrysynda  Túrikmenstannyń Mary qalasy – 2015 jyldyń túrki dúnıesiniń mádenı bas qalasy bolyp bekitilgen edi. Osyǵan oraı, jaqynda Qazannan kelesi estafetany alǵan Mary qalasynda «Mary – túrki dúnıesiniń mádenı bas qalasy-2015» jylynyń saltanatty ashylý rásimi ótti.

Marydaǵy «Rýhyet» memleket­tik saraıynda ótken sharaǵa Túrik­menstannyń Parlament depýtat­tary, túrkitildes elderdiń mádenıet vedom­stvolary men qoǵamdyq uıym­darynyń ókilderi, ǵalymdar men mádenıet qaıratkerleri, jýrnalıs­ter men jastar qatysty.  Sondaı-aq, Halyqaralyq TÚRKSOI uıymy­nyń ókilderi men Qazaqstan, Ázerbaı­jan, Qyrǵyzstan, Túrkııa, Makedo­nııa, Bosnııa men Gersegovına, Vengrııa, Bolgarııa, Gagaýzııa (Mol­dova Respýblıkasy), Reseı Federasııa­synyń quramyndaǵy Tatarstan, Bashqurtstan, Hakasııa, Tyva, Saha-Iаkýtııa, Kalmaq, Altaı syndy túrki áleminiń túkpir-túkpirinen shyǵarmashylyq uıymdar da boldy. Sharanyń saltanatty ashylý rásimine arnaıy sálem hat joldaǵan Túrikmenstan Prezıdenti Gýrbangýly Berdimuhammedov tarıhı sharaǵa qatysyp otyrǵan barlyq qonaqtardy aıtýly merekemen quttyqtap, adamzat órkenıetiniń tarıhynda eleýli orny bar ejelgi Mary qalasynyń túrki dúnıesindegi mánin ashyp, túrikmen halqynyń ejelden kele jatqan salt-dástúri, óneri men mádenıeti álem halyqtarynyń jaqyndasýyna qyzmet etetindigin tilge tıek etken. Merekelik sharanyń tarıhı­ mańyzdylyǵyn baıan etken TÚRKSOI-dyń Bas hatshysy Dúı­sen Qa­seıinov Túrikmenstan Prezı­den­tine halyqaralyq sharanyń ótýine qoldaý kórsetip, túrki dúnıe­siniń óner men mádenıet salasyna qosqan súbeli úlesi úshin alǵys bildirdi. «Búgingi kúni «Túrki dúnıesiniń mádenı bas qalasy» jobasynyń aıasynda estafetany qabyldap alǵan ejelgi Mary qalasy IýNESKO-nyń Búkilálemdik tizimine engeni barshaǵa málim. Osy qasıetti jerde álemdik órkenıettiń ortalyqtary men jalpy mádenı muranyń qundylyqtaryn sezinýge bolady.  Sondyqtan Mary qalasynyń teńdessiz mádenı murasy túrki dúnıesine ortalyq bolýǵa ábden laıyqty», – dep sharanyń mánin tereńdete tústi Bas hatshy. Shara sheńberinde ótken konsertke elimizdiń talantty óner­paz­dary óz úlesterin qosty. «Aq-jaıyq» ansambliniń T.Aqbóken, A.Noǵaıbaeva, Á.Nabıeva, A.Er­janova, T.Jumaǵalıev, G.Juma­taeva, A.Jalǵapov, B.Aqtaev, E.Baı­muratov, S.Baımenova esimdi óner­pazdary qazaqtyń dástúrli mýzy­kasymen qonaqtardy tánti etti. Ásirese, belgili dombyrashy Temir Aqbókenniń túrikmenniń ulttyq aspaby dýtarmen qazaqtyń kúılerinen poppýrı oryndaǵanda túrikmen jurtshylyǵy dán rıza boldy, deıdi TÚRKSOI-daǵy Qazaq­stannyń ókili Málik Otarbaev. «Egemen-aqparat».