Ol óziniń búgingi tirshiligine kóńil tolmaýshylyǵyn bildirdi: «Eger mekteptegi muǵalimderim jaqsy bolǵanda men óstip qolyma kúrek ustap qara jumys istep júrer me edim... Túk úıretpedi, bári shetinen dym bilmeıtin. Solardyń kesirinen mine júrisimiz osy».
Tanys-beıtanys bul kisiniń men biletin óte bilimdi, jaýapty qyzmetter atqarǵan, ǵylymǵa da qol sozǵan túıdeı qurdasy, bir mektepte on bir jyl qatar oqyǵan synyptasy bar. Sol kisi birde aǵynan jaryla otyryp bylaı dep edi: «Búgingi jetken barlyq jetistigim áýeli Qudaıdyń, sosyn ata-anam men mekteptegi muǵalimderimniń arqasy. Basqasyn aıtpaǵanda, muǵalimderimiz shetinen óte myqty boldy. Olar bilim alýǵa degen qushtarlyǵymyzdy oıatyp, ómirde tek alǵa umtylýymyzǵa úndedi».
Bir mektep, bir synyp, ortaq muǵalimder... Týasy, bári árkimniń óz sanasyna, qajetti dúnıeni qabyldaý qabiletine qatysty-aý deımin. Degenmen, árkim taǵdyr-talaıyna, peshenesine jazylǵanyn kóredi ǵoı.