ASTANA. 5 aqpan. Qurlyqtyq hokkeı lıgasyndaǵy kezekti oıynynda astanalyq «Barys» qonaqta «Sochı» komandasyn 2:4 esebimen jeńdi. Bul týraly egemen.kz habarlady.
Oıynnyń nebári 24-sekýndynda «Barys» sapynan Maık Landın eki mınýtqa aıdynnan qýylyp, jergilikti komanda oıynshy basymdyǵyna ıe boldy. Birden shaıbaǵa ıelik etken aıdyn ıeleri bizdiń qaqpany torýylǵa aldy. Tórt oıynshymen qalǵan «Barystyń» qorǵanysy aıyp ýaqytynyń aıaqtalýyna 3 sekýnd qalǵan kezde ǵana syr berip, sochılikter esep ashty. Mıhaıl Anısınnen pas alǵan Maks Vıarn óz jankúıerlerin qýanyshqa bóledi.
Shaıba jiberip alǵanyna qaramastan, qonaqtardyń qarqyny báseńdegen joq. Qaıta «Sochı» hokkeıshileri jıi qatelikke boıy aldyryp, birinen soń biri tártip buzdy. Nátıjesinde, 13 jáne 14-mınýttarda Igor Ignatýshkın men alǵashqy shaıbanyń avtory M.Vıarn aıdynnan qýylyp, «Barys» eki birdeı oıynshy basymdyǵyna ıe boldy. Qazaqstandyq komanda ózderine berilgen múmkindikti múlt jibermeı, esepti teńestirip ketti. Roman Starchenkodan pas alǵan M.Landın qaqpaǵa soqqy jasamaı, shaıbany qarsy qaptaldaǵy Kevın Dallmenge asyrdy. О́z kezeginde «Barystyń» eks-kapıtany birden qaqpany nysanaǵa alyp, «Sochı» qaqpashysy Andreı Gavrılovtan aılasyn asyrdy.
Ekinshi kezeń tolyǵymen bizdiń komandanyń basymdyǵymen ótti. Úzilisten keıin de óz oıyn órnegin taba almaǵan Vıacheslav Býsaev shákirtteri 22-mınýtta «Barysqa» taǵy bir múmkindik syılady. Iаǵnı, jergilikti komanda sapynan qorǵaýshy Dmıtrıı Shvıdenko eki mınýttyq aıyp ýaqytymen jazalandy. Astanalyqtar birden oıyn tizginin qoldaryna alyp, shabýylǵa kóshti. Roman Starchenko men Konstantın Rýdenko uıytqy bolǵan shabýylǵa Maksım Semenov núkte qoıyp, esepti 1:2-ge jetkizdi.
Eki birdeı shaıbanyń soǵylýyna úles qosqan R.Starchenko 30-mınýtta ózi de mergendigimen kózge tústi. Kók jolaqtyń boıynan shaıbaǵa ıelik etken Roman bir ózi «Sochıdiń» bar qorǵanysyn buzyp ótip, komandasynyń úshinshi shaıbasyn soqty. Al ekinshi úziliske 3 mınýt qalǵan kezde Naıdjel Doýs qaqpa aldyndaǵy qarbalasty paıdalanyp, tablodaǵy kórsetkishti «Barystyń» paıdasyna 1:4 qylyp túzedi. Doýsqa nátıjeli pas bergen komanda kapıtany Brendon Bochenskı.
Sońǵy kezeńde «Sochıdiń» bir ǵana shaıba soǵýǵa shamasy jetti. Tartystyń aıaqtalýyna 3 mınýt qalǵanda M.Anısın Pavel Polýektov qorǵaǵan qaqpany dál kózdedi. Bul sátte aıdyn ıeleriniń bir oıynshysy artyq bolǵanyn aıta ketken jón.
Oıynnyń qalǵan ýaqytynda esep ózgermeı, «Barys» maýsymdaǵy 25-jeńisine qol jetkizdi. Onyń 19-y negizgi ýaqytta tirkelse, qalǵan 6 kezdesýde astanalyqtar qosymsha ýaqytqa nemese oıyn sońyndaǵy býllıtke júgindi. Taǵy bir aıta keter jaıt, «Barys» bıylǵy maýsymda «Sochıden» osymen ekinshi ret basym tústi. Astanada ótken alǵashqy oıynda jeńimpaz býllıt arqyly anyqtalyp, «Barys» 5:4 esebimen jeńiske jetken edi.
Búginde Andreı Nazarov jattyqtyratyn komanda 77 upaımen Shyǵys konferensııasynda 6-orynda tur. Konferensııadaǵy basty qarsylasymyz ýfalyq «Salavat Iýlaev» ázirge 5-satyǵa jaıǵasqan. Olardyń da qorjyndarynda 77 upaı bar. Degenmen, «Barystyń» keıinge shegerilgen eki oıyny baryn eskersek, QHL-dyń turaqty chempıonatyn 5-orynmen aıaqtaýǵa múmkindik bar. Bizdiń komanda lıga aıasyndaǵy kelesi oıynyn 6 aqpan kúni Nıjnıı Novgorodta jergilikti «Torpedoǵa» qarsy ótkizedi. Batys konferensııasynda oınaıtyn «Torpedo» búginde 70 upaımen 9-satyda keledi.
Elaman Qońyr.
Derek: egemen.kz.
Sýret: hcsochi.ru.