Italııanyń Týrın qalasynda HHHII dúnıejúzilik Qysqy Ýnıversıada oıyndary aıaqtaldy. El úmitin arqalaǵan sportshylarymyz dúbirli dodadan 14 medal oljalap, jalpy esepte 12-satyǵa turaqtady. On kúnge ulasqan qysqy alamanda elimizden attanǵan 103 sportshy 11 sport túrinen dodaǵa qosylyp, 3 altyn, 4 kúmis, 7 qola medal ıelendi.
Týrın tórinde án-uranymyzdy shyrqatyp, baıraǵymyzdy jelbiretken sańlaqtardyń jeńisi maqtaýǵa laıyq. Jasóspirimder arasynda álem chempıony ataǵyna ıe Anastasııa Gorodko eresekter sapyndaǵy alǵashqy dodasynda da top jaryp, mereıimizdi asyrdy. Frıstaıl-mogýldan jekeleı synda óziniń sheberligimen tánti etken sańlaq paralell-mogýlda da qara úzip, Qysqy Ýnıversıada oıyndarynan eki altyn medal oljalady. Shyǵys Qazaqstan oblystyq sport mektebiniń túlegi, Qazaq týrızm jáne sport akademııasynyń 3-kýrs stýdenti A.Gorodko bolashaǵynan mol úmit kúttiredi. Buǵan deıin jasóspirimder arasynda daralanǵan sańlaq álem nazaryna ilikti. Kelesi jyly Italııa eli qysqy Olımpııa oıyndaryn ótkizedi. Mine, osy dodaǵa úkilep qosatyn úzdigimizdiń biri – Anastasııa Gorodko.
Úshinshi altyn medaldy enshimizge bóktergen Nıkıta Akımov ta – Shyǵys Qazaqstan oblysyndaǵy joǵary sport sheberligi mektebiniń túlegi. Bıatlonnan 10 shaqyrymdyq saıysta aldyna qara túsirmegen «Mıras» ýnıversıteti stýdentiniń kelesheginen de kemel úmit kútemiz.
Qysqy Ýnıversıada oıyndarynda kúmis medalmen kúptelgen sportshylarymyzdyń da jetistigi aıtarlyqtaı. Frıstaıl-mogýldan jekeleı synda 4-orynǵa turaqtaǵan Aıaýlym Ámirenova paralell-mogýlda kúmis medal ıelendi. Ál-Farabı atyndaǵy Qazaq ulttyq ýnıversıtetiniń doktoranty Aıaýlym Týrınnen oljasyz qaıtpady. Aıaýlym 2018 jyly Ońtústik Koreıanyń Phıonchhan qalasynda, 2022 jyly Qytaı astanasy Beıjińde ótken qysqy Olımpııa oıyndaryna qatysty. 2017 jyly Eýropa kýboginiń kezeńderine júlde enshiledi. Frıstaıl-mogýldan erler arasyndaǵy synda kúmis medal enshilegen Anton Bondarev – S.Amanjolov atyndaǵy Shyǵys Qazaqstan ýnıversıtetiniń stýdenti. Shańǵy jarysynan eki qashyqtyqta da kúmis medal oljalaǵan parashańǵyshy Denıs Zınovtyń eńbegi eren. Ol – el sportynyń ustahanasy sanalatyn Qazaq sport jáne týrızm akademııasynyń stýdenti.
Bul oqý ordasynyń ózge stýdentteri de Týrın tórinde tolaıym tabysqa qol jetkizdi. Qysqy Ýnıversıada oıyndarynyń qola medalin parashańǵydan Roman Qurbanov eki qashyqtyqta enshilese, mánerlep syrǵanaýdan Sofıa Samodelkına, bıatlonnan Arına Krıýkova, Kırıll Baýer qola júldeger atandy. Tórteýi de Qazaq sport jáne týrızm akademııasynyń stýdentteri.
Short-trekten aralas estafeta saıysynda el qorjynyna qola júldeni Batys Qazaqstan ınnovasııalyq-tehnologııalyq ýnıversıtetiniń stýdenti Alına Ájiǵalıeva, Valerıı Klımenko, Dinmuhamedaldııar Tájibaı, M.H.Dýlatı atyndaǵy Taraz ýnıversıtetiniń stýdenti Malıka Ermek saldy. Eki jyl buryn AQSh-ta ótken qysqy Ýnıversıada oıyndarynda aralas estafetadan qyz-jigitter kúmis medal enshilegen bolatyn. Týrınde sol bıigine jete almady. Erler quramasy sapynda Dinmuhamedaldııar Tájibaı, Valerıı Klımenko, Aıbek Temirhan, Sanjar Janysov, Álisher Abdýlqatymov synǵa túsip, qola medal ıelendi.
HHHII dúnıejúzilik Qysqy Ýnıversıada oıyndarynda 96 medal jıyntyǵy báıgege tigildi. 57 elden kelgen 2000-nan astam stýdent-sportshy 10 kún boıy dodaǵa tústi.
Bizdiń sportshylar dúnıejúzilik qysqy Ýnıversıada oıyndaryna 1993 jyldan beri turaqty qatysyp keledi. Sol jyly Polshanyń Zakopane qalasynda ótken alamanda elimiz sportshylary 1 kúmis medaldi mise tutty. 1995 jyly Ispanııanyń Haka qalasy qabyldaǵan qysqy Ýnıversıada oıyndarynan 2 altyn, 1 qola medalmen oraldy. 1997 jyly Ońtústik Koreıa, 1999 jyly Slovakııa, 2001 jyly Polsha elinde ótken oıyndardan sportshylarymyz júldesiz qaıtty. 2003 jyly Italııada ótken jarystan 2 altyn, 1 kúmis, 1 qola, 2005 jyly Aýstrııa eli ótkizgen dodadan 4 altyn, 1 kúmis, 2 qola medal oljalady. 2007 jyly Italııanyń Týrın qalasy qabyldaǵan qysqy Ýnıversıadada 2 altyn, 1 kúmis, 2 qola júlde buıyrdy. 2009 jyly Qytaıdyń Harbın qalasynda stýdent sportshylarymyz medal almasa, 2011 jyly Túrkııada 1 altyn, 5 qola medal enshileıdi. 2013 jyly Italııanyń Trentıno qalasyn dúbirge bólegen aq alamanda 2 altyn, 2 kúmis, 1 qola medal buıyrdy. 2015 jyly dúnıejúzilik Qysqy Ýnıversıada oıyndaryn Ispanııa men Chehııa tize qosyp ótkizdi de, bizdiń elden barǵan sportshylar 5 altyn, 6 kúmis medal enshiledi. 2017 jyly elimiz tuńǵysh ret qysqy Ýnıversıada oıyndaryn ótkizdi. Almaty qalasyndaǵy dodada sportshylarymyz 11 altyn, 8 kúmis, 17 qola medal ıelenip, tarıhı nátıje tirkedi. Odan keıin 2019 jyly Reseıde ótken saıysta 4 kúmis, 3 qola buıyrdy. 2023 jyly AQSh uıymdastyrǵan dodada 3 altyn, 4 kúmis, 4 qola medal ıelendi.