Birinshi atom elektr stansasyn salý týraly sheshim elimizdiń energetıkalyq saıasatynyń jańa kezeńin ashady. Bul bastama – eldiń energetıkalyq qaýipsizdigin nyǵaıtýdyń jáne kómirqyshqyl gazyn qysqartý jónindegi maqsattarǵa qol jetkizýdiń negizgi tetigi. Sondaı-aq strategııalyq baǵyt retinde atom energetıkasyn damytýdaǵy Úkimettiń baıypty nıetin rastaıdy.
Qazir ekinshi jáne úshinshi atom elektr stansalaryn salýǵa bolatyn yqtımal alańdarǵa taldaý júrgizilip jatyr. Bul qadam eldiń elektr energııasyna ósip kele jatqan qajettiligin jáne energııamen jabdyqtaý kózderin ártaraptandyrý qajettiligin eskere otyryp, der kezinde qabyldanǵan qajetti shara bolyp esepteledi. Eń bastysy turaqty energııa kózi arqyly ekonomıkanyń qalypty damýyn qamtamasyz etedi. Bul iste biz damyǵan elderdiń jol alǵan baǵytyna qarap umtylýymyz kerek.
Elektr energııasyn óndirý ádisi jasyl ári turaqty. Eýropada 2030 jylǵa qaraı elektr energııasyna suranys 50%-ǵa artpaq. EO elektr energııasyna degen suranysty qalaı arzan, senimdi, qaýipsiz ári ekologııalyq taza túrde qanaǵattandyra alady? Bul suraqqa Eýropa elderiniń atom energetıkasyn damytý ıdeıasyna qaıta oralyp, buryn jabylǵan atom elektr stansalaryn qaıta iske qosý jumystaryn kúsheıtý faktisi jaýap bolmaq. Adamzattyń elektr energııasyna degen qajettiligin arzan, senimdi, qaýipsiz jáne qorshaǵan ortaǵa zııansyz qanaǵattandyratyn energııanyń bir ǵana túri bar. Ol – ıadrolyq energııa. Muny eýropalyqtar áldeqashan moıyndap qoıǵan.
Qańtarda jarııalanǵan Halyqaralyq energetıkalyq agenttiktiń (HEA) «Iаdrolyq energııanyń jańa dáýirine aparatyn jol» baıandamasyna sáıkes ıadrolyq energetıka jahandyq energetıkalyq qaýipsizdikke jáne dekarbonızasııaǵa qol jetkizýde mańyzdy ról atqarady.
Aıdyn Baqdolatov,
Klımattyń ózgerýi ortalyǵynyń dırektory