Kóktemgi sý tasqynyna ázirlik barysy Prezıdent janyndaǵy ortalyq kommýnıkasııalar qyzmetinde ótken baspasóz konferensııasynda sóz boldy.
Tótenshe jaǵdaı mınıstrligi Tótenshe jaǵdaılardyń aldyn alý komıteti tóraǵasynyń mindetin atqarýshy Áset Jylqaıdarov ortalyq memlekettik, jergilikti atqarýshy organdarmen birlese atqarylyp jatqan sý tasqynyna daıyndyq barysyn baıandady. Spıker tasqyn qaýpi elimizdegi 1 223 eldi mekenge tónýi múmkin ekenin atap ótti. Qyzyl sýǵa qarsy 576 shaqyrym qorǵanysh bógeni men bilikteri turǵyzyldy. 822 shaqyrymdyq drenaj júıesi, toǵandar men aryq arnalary tazartylyp, bitelgen kózderi ashyldy. Avtomobıl, temirjol boılarynda 960 sýaǵar salyndy.
– 74 ózenniń boıyndaǵy qaýipti ýchaskeleriniń 500 shaqyrymǵa jýyq bóliginiń arnasyn keńeıtip, tabanyn tereńdetý, jaǵalaýdy myǵymdaý jumysy qolǵa alyndy. Tasqyn kezinde zardap shekkenderdi qabyldaýǵa 3,5 myńnan asa pýnkt daıyndaldy. Sý tasqynyna jedel qamdanýǵa 37 myńnan asa adam qamtylyp, 13 myńnan asa tehnıka, 4 096 sý aıdaý, 640 júzý quraldary bar azamattyq qorǵaý qyzmetteri quryldy. Azamattyq qorǵanystyń áskerı bólimderiniń de daıyndyǵy joǵary, qutqarý avıasııasy jedel kezekshilik atqaryp otyr, – dedi Á.Jylqaıdarov.
Sý tasqynyna qarsy shtab táýlik boıy jumys isteıdi. Memlekettik organdar, atap aıtqanda, Ishki ister, Qorǵanys mınıstrlikteri, Ulttyq ulan, «Qazgıdromet», «Qazsýshar», «Qazavtojol» mamandary jumyldyrylǵan shtab ár óńirde bar. Sonymen qatar komandalyq-shtabtyq mashınalar bazasynda tótenshe jaǵdaılar týyndaýy múmkin aımaqtardan naqty aqparat berý úshin jedel basqarý toptary quryldy. Ońtústik, batys óńirlerdiń sý tasqyny tónýi múmkin ýchaskelerinde beketter qoıyldy. Olar táýlik boıy qalyptasqan jaǵdaı týraly aqparatty habarlap otyrady.
«Qazgıdromet» mamandarynyń aldyn ala boljaýynsha, elimizdiń 9 óńirinde (Aqtóbe, Abaı, Aqmola, ShQO, BQO, Qaraǵandy, Ulytaý, SQO, Qostanaı oblystary) kóktemde sý basý qaýpi joǵary. «Apat aıtyp kelmeıdi», spıker jalpy kúshter men quraldar daıyn ekenin atap ótti, tótenshe jaǵdaıǵa baılanysty qaýipti óńirlerge kúshter men quraldardy jetkizý, halyqty evakýasııalaý, sondaı-aq avarııalyq-qutqarý jumystaryn júrgizý jóninde tıisti sheshim qabyldanatynyn málim etti.