Serbııanyń astanasy – Belgrad qalasynda 53-shi márte márege jetken «Boegradskı Pobednık» halyqaralyq týrnırinde Qazaqstan boksshylary komandalyq esepte birinshi oryndy jeńip aldy. Olar buǵan jarysta 4 altyn, 1 qola medal ıelený arqyly qol jetkizdi.
Jerlesterimizge birinshi altyn medaldy 52 kg salmaqtaǵy astanalyq Azat Mahmetov áperdi. Ol shırek fınalda fransııalyq Elıe Konkıdi, jartylaı fınalda germanııalyq Ronnı Beblıkti 3:0 degen birdeı eseppen utyp, fınalda moldovan Aleksandr Rıskandy 2:1 etip tize búktirdi. Bulardyń sońǵy ekeýiniń talaı saıysta júlde alyp júrgen tarlandar ekenin jankúıer qaýym biletin shyǵar degen oıdamyz.
Kelesi altyn medalǵa almatylyq Janbolat Tilegenuly (56 kg) ıe boldy. Týrnırdi jartylaı fınaldan bastaǵan ol shotland Stefan Boıleni – 3:0, moldovan Vıacheslav Goıandy 2:1 esepterimen jeńdi. Al qyzylordalyq Rýstam Svaev (75 kg) týrnırdiń jeńimpazy bolýmen qatar, onyń eń úzdik boksshysy da atandy. Bir qyzyǵy, atalmysh ataq onymen fınalda shaıqasqan serb Aleksander Drenovakqa da berildi. Bizdiń jigit bul urysty 2:1 esebimen óz paıdasyna sheshe bildi. Rýstam munyń aldynda shotland Borıs Krıgton – 2:1, norvegııalyq Sýrho Shamılovtan 3:0 esepterimen basym túsken edi.
Komanda qorjynyndaǵy tórtinshi altyn medaldy shymkenttik Nurjan Bekzatov ákeldi. Asa aýyr salmaqtaǵy boksshymyz óziniń osyndaǵy eki aıqasyn da merziminen buryn aıaqtady. Atap aıtqanda, jartylaı fınalda moldovalyq Alekseı Zlatındi 2-raýndta nokaýtqa jibergen ol fınalda serb Nemanıa Stolıchti 1-raýndta-aq «iske alǵysyz» etip tastady.
Shymkenttik taǵy bir boksshymyz, 81 kıloǵa deıingi salmaqtaǵy Nurbol Altaev qola medalmen toqtady. Shırek fınalda birinshi urysyn cheh Tomas Bezvodamen ótkizip, jeńiske jetken (3:0) ol jartylaı fınalda grek Polıneıkıs Kalamarastan utyldy – 1:2. Al 60 kg salmaqtaǵy semeılik Ilııas Jaqsylyqov alǵashqy shaıqasyn keıin týrnırdiń jeńimpazy atanatyn gollandııalyq Enrıko Le Krýzben ótkizip, 0:3 esebimen ese jiberip aldy.
Týrnırge barlyǵy 20 elden 116 bylǵary qolǵap sheberi qatysty. Komandalyq esepte ekinshi orynǵa Moldova quramasy shyqsa, úshinshi satyǵa Shotlandııa boksshylary ornalasty. Qazaqstan quramasyn bul jarysqa jattyqtyrýshy Marat Eleýsinov bastap bardy.
Damır QOJAMQUL.