Almatyda sozyldy nemese Assambleıa tatý bolsa as kóp
1 mamyr merekesine oraılastyryp Almaty qalasy ákimi apparatynyń «Qoǵamdyq kelisim» KMM Qazaqstan halqy Assambleıasynyń qoldaýymen qalalyqtarǵa erekshe syı tartý etti. Assambleıa tatý bolsa as kóp eken, osylaısha álemdegi eń uzyn laǵman da jasaldy.
Almatylyqtar men qala qonaqtaryn eleńdetken erekshe oqıǵa Quddys Qojamıarov atyndaǵy Memlekettik uıǵyr mýzykalyq komedııa teatrynyń saıabaǵynda ótti.
Álemdegi eń uzyn laǵmandy sozýǵa besaspap aspazdar shaqyrylǵan. 30 birdeı aspaz uıǵyrlardyń dástúrli laǵman daıyndaý ádisimen salmaǵy 687 kılogramm bolatyn dámdi asty daıyndap, jınalǵan jurtqa dám tatqyzdy.
Aspazdar aldyn ala kemi 1500 kisige laǵman daıyndaıtyndaryn jarııalaǵan bolatyn. Degenmen, merekede adam basyn sanap otyrǵan eshkim joq, biraq jer betindegi eń uzyn laǵmandy jeýge kelgender sany jetkilikti boldy.
Qalalyqtar máre-sáre bolyp jatqan is-shara barysynda merekelik konsertter, laǵman jasaýdan sheberlik-sabaǵy, mádenı oıyn-saýyq baǵdarlamasy qosa uıymdastyrylyp, oǵan ulttyq mádenı ortalyqtardyń ókilderi atsalysty.
Osynaý erekshe oqıǵa barysynda Soltústik polıýske baryp kelgen Birinshi qazaqstandyq shańǵy ekspedısııasynyń múshelerimen kezdesý uıymdastyrý kózdelgen bolatyn.
Atalmysh naýqanǵa Qazaq geografııalyq qoǵamynyń kezekti rekordyn ornatý úshin, Gınnes rekordtar kitabynyń tóreshileri shaqyryldy.
Almatyda Qazaqstan halqynyń birligi merekesine oraı ózge de ońdy oqıǵalar bolyp jatty. Qalanyń basty meıramy Ortalyq mádenıet jáne demalys saıabaǵynda qala ákimi Ahmetjan Esimovtiń qatysýymen márege jetti. Al sol ıgi sharalardyń barlyǵynda derlik Elbasynyń bastamasymen qurylǵan Qazaqstan halqy Assambleıasy bolǵanyna sát saıyn kýá boldyq.
Búgingi tańda Almaty qalasynyń Qazaqstan halqy Assambleıasynyń quramyna 34 etnomádenı birlestikter kiredi. Bul mádenı ortalyqtardyń barlyǵy da aýyzbirshilik pen tatýlyqqa qyzmet etip, úlken eldik sharalardyń shyraıyn keltirýge barynsha atsalysyp keledi.
Aınash ESALI,
«Egemen Qazaqstan».
ALMATY.
Sýretti túsirgen
Aıtjan MURZANOV.