Ulttyq quryltaı Prezıdent janyndaǵy konsýltatıvtik-keńesshi organ retinde qoǵamdyq birigýdi nyǵaıtýǵa baǵyttalǵan usynystar men strategııalardy ázirleýde mańyzdy ról atqarady. Ulttyq quryltaı alańynda azamattardyń ál-aýqatyn arttyrýǵa jáne ómir sapasyn jaqsartýǵa baǵyttalǵan mańyzdy qoǵamdyq máseleler kóterilip, olardyń sheshý joldary usynylady. Solardyń biri – jappaı kásipkerlikti damytý jaıy.
Jastar saıasaty tujyrymdamasy aıasynda jas kásipkerler úshin jyldyq 2,5% jeńildikpen nesıe berý bastamasy engizilgen. Abaı oblysynda da jastardy ekonomıkalyq jáne qoǵamdyq ómirge tartýǵa baǵyttalǵan birqatar baǵdarlama júzege asyryldy. 2023 jyly oblys jastary arasynan 226 adam jalpy somasy 1 mlrd teńge kóleminde jeńildetilgen mıkronesıe aldy. Nesıe alǵandardyń basym bóligi mal sharýashylyǵymen aınalysady (167). Sondaı-aq qyzmet kórsetý (44), saýda (9), jeńil jáne aýyr ónerkásip (5), agroónerkásiptik ónimderdi qaıta óńdeý (1) salalary qamtylǵan.
О́ńirde bilim alýmen de, jumyspen de aınalyspaıtyn jastar (NEET sanaty) máselesi ózekti bolyp otyr, olardyń sany shamamen – 6 029 adam. Bul máseleni sheshý úshin jastardy áleýmettik jáne ekonomıkalyq belsendilikke tartý tetikteri engizilip jatyr. «Zhas project» aıasynda 8 jas 1 mln teńgeden grant alyp, bastamalaryn júzege asyrýǵa kiristi. Jazǵy maýsymda 1 004 azamat «Jasyl el» baǵdarlamasyna qatysyp, ýaqytsha jumyspen qamtyldy.
Ulttyq quryltaı jumysy barysynda bıznestiń qoǵamdyq jaýapkershiligine erekshe mán berildi. Kásipkerlerge mektep, aýrýhana, kitaphana, sport nysany jáne basqa da ınfraqurylymdyq jobalarǵa ınvestısııa salýǵa úndeý jasaldy. Mundaı ıgi bastamany qoldaıtyn bıznes ókilderi joq emes. Mysaly, Semeı qalasynda jeke ınvestor zamanaýı jabyq akvapark jobasyn ázirlep jatyr. «KAZ Minerals» kompanııasy oblys ortalyǵynda jalpy quny 9 mlrd teńgeden asatyn 1 200 orynǵa laıyqtalǵan jańa IT-mektep-lıseıin salyp, bilim salasyna aıtarlyqtaı úles qosty. Bul bastamalar ózge de kásipkerlerge úlgi bolyp, olardyń áleýmettik jobalarǵa atsalysýyna serpin beredi dep senemiz.
Ulttyq quryltaı – tek pikirtalas alańy emes, naqty sheshimder qabyldaý tetigi. Quryltaı músheleri máselelerdi kóterip qana qoımaı, sheshimder usynyp, iske asyrýǵa yqpal etedi. Birlesken kúsh-jigerdiń arqasynda naqty nátıjelerge qol jetkizýge bolady.
Berik Qadyrov,
Prezıdent janyndaǵy QSZI Abaı oblysy boıynsha ókili