Qazaqstannyń eńbek sińirgen qaıratkeri, Prezıdent syılyǵynyń laýreaty, jýrnalıst-jazýshy Qaısar qajy Álimniń osylaı atalǵan kitabynda («Folıant» baspasy, Astana, 2015 j.) Mekke, Mádınaǵa jasaǵan qajylyq sapary (07-29.10.2013 jyl) týraly baıandalady.
Avtordyń jalpy ımandylyq qundylyqtaryna negizdelgen oı-paıymy, maqsat-ańsary, kórgen-bilgeni, túısik-túıgeni, sezim-syry kitaptyń altyn arqaýyna aınalǵan.
Bul kitaptyń jazylý syryn avtor alǵy sóz retinde berilgen «Júrek sózi» nemese jolaı joǵalǵan júgimniń Allanyń qudiretimen qolyma tutastaı tabystalǵany týraly» degen ańdatpasynda aıqyndap túsindirip ótedi. Astana áýejaıynda júginiń bir bóligi ǵana qolyna tıedi... Ekinshi býmasy joq bop shyǵady. Sol júginde – Qurannyń sývenırlik kitaptary, Qaǵba beınelengen kilemsheler, jaınamazdar, tasbıhtar sekildi syı-sııapattary bar bolatyn. Sondaı-aq, janyn óksitkeni – yqtııattap júrgizgen kúndelik-qoljazbasy da sol qapshyqtyń ishinde qalǵan edi...
«Sol kúndelik-qoljazbam qaıtpaǵanda, bul kitabym – qajylyq paıymym qalaı jazylar edi dep, kúńirenip, ile táýbeme kelemin! Jazylar-aý, biraq izin sýytpaı dápterime túrtken, derekterdiń dálme-dáldigi, týlaǵan sezim ushqyny, ımandylyq ıirimi, tazarǵan júrek sózi, bári-bári aına qatesiz sol kúıinde til ushyna oralar ma edi, oralmas pa edi...» – degen qalamgerdiń sabaǵa túsirgen sózi oqyrmandy da aýyr oılardan aryltyp alǵandaı áser eteri sózsiz.
Sonymen, jaqsy kitap ómirge kelipti. «Mekke», «Mádına» bólimderinen turatyn qajylyq sapardyń ár kúni júrekjardy ımandylyq ıirimderine toly eken. Mazmuny sýrettermen baıytyla túsken.
Nurbek SÁBITOV.