Oblys ortalyǵynda qamshy órýden saıys ótti. Jasóspirimder umyt bolyp bara jatqan ulttyq ónerdi qaıta jańǵyrtyp, qaıys taspalarynan túıin túıýden sheberligin kórsetti.
Buqar jyraý atyndaǵy ádebıet jáne óner mýzeıi mektep oqýshylarynyń qolónerge degen qyzyǵýshylyǵyn arttyrýǵa den qoıyp keledi.
«Saıysty Naýryz meıramyna oraı uıymdastyrdyq. Qamshy órý ónerin nasıhattaý arqyly er balalardy ulttyq qolónerge baýlý, shyǵarmashylyqqa jeteleý, izdenisin damytý kózdeldi», deıdi mýzeı basshysy Erbol Qaıyrov.
Baıqaý eki kezeńnen turdy. Alǵashqysynda 10 qatysýshy qazylar alqasyna órip ákelgen qamshylaryn tanystyryp, jasalý ádisterin baıandady. Al ekinshi kezeńge ótken 5 qatysýshy qaıys taspalarynan qamshy órý sheberligin kórsetti.
«Men jastaıymnan jylqy baqqan adammyn. Halqymyz ejelden jigittiń bes qarýy boıynda bolýy kerek dep bilgen. Qamshynyń qasıetin, qoldaný ereksheligin úlkenderden úırenip, jadymyzǵa tutyp óstik. Máselen, jylqyshylar qamshynyń búldirgisin sabynyń eń ushynan salady. Sebebi jylqyǵa buǵalyq salý kezinde qamshyny sol qolymyzǵa ustaýǵa yńǵaıly», deıdi qamshy órýdiń sheberi, qazylar alqasynyń múshesi Jańbyrbaı Áýbákirov.
Baıqaý qorytyndysynda Y.Altynsarın atyndaǵy daryndy balalarǵa arnalǵan oblystyq qazaq gımnazııa-ınternatynyń 10-synyp oqýshysy Bıjan Tasqynuly jeńimpaz atandy. Pavlodar qalasynyń №29 orta mektebiniń oqýshysy Samat Nursultan ekinshi, Álıhan Bókeıhan atyndaǵy lıseı-mektebiniń oqýshysy Qabdolbek Aıat úshinshi orynǵa ıe boldy.
Pavlodar oblysy