Bıylǵy Naýryz merekesi qarsańynda Aqtóbede erekshe kúntizbe jaryqqa shyqty. Onyń sheber kórkemdelgen bastapqy bet-muqabasyna «Aqtóbe. 2025 jyl. Jumysshy mamandyqtar jyly» dep jazylǵan. Kúntizbe ádettegideı qańtar aıynan emes, Shyǵystyń jyl basy sanalatyn 22 naýryzdan bastalady. Iаǵnı bıylǵy naýryzdan kelesi jylǵy naýryzǵa deıingi ýaqyt aralyǵyn qamtıdy.
Alǵashqy paraq «Jyl basy. 22 naýryz. Senbi» degen jazýmen ashylady. Ásem bezendirilgen paraqtyń orta tusy paraqshany qoldanýshynyń óz josparlaryn, oılaryn jazyp otyrýy maqsatynda dápterdiń jolaq joldary syndy bos qaldyrylǵan.
Al qazaqy órnek salynyp, kók týymyzdyń túsimen boıalǵan kórneki tustan «Jyl basy Ulystyń uly kúni Naýryz — bizdiń dástúrimizdiń qaıtalanbas belgisi. Bul meıram halqymyzdyń mádenıeti men tarıhyn, sol sııaqty bizdiń birligimiz ben yntymaǵymyzdy aıqyndaıdy. Q.Toqaev» degen qanatty sózdi oqımyz.
Kúnparaqtyń birinshi ereksheligi — naýryzdan-naýryzǵa deıingi ýaqytty qamtysa, ekinshi ereksheligi — osylaı ár paraq saıyn Prezıdentimiz Qasym-Jomart Toqaevtyń ár kezeńde, ár tusta aıtqan, baǵdarymyzǵa aınalǵan ustanymynyń berilýi. Parasatty paıymdaýlar paraqtan-paraqqa jaı jalǵaspaıdy, elimizdiń mereıli, dataly kúndermen, belgili qaıratkerlerimizdiń, aqyn-jazýshylarymyzdyń, basqa da ardaqtylarymyzdyń mereıtoılyq týǵan kúnderimen mazmundas kelip, qadyr-qasıetin asha túsedi.
Máselen, bıylǵy 24 naýryzda belgili ǵalym Ebineı Bóketovtiń týǵanyna 100 jyl tolady. Aıtýly ǵalymnyń mereıtoıyn eske salǵan paraqta Prezıdentimizdiń «Biz ǵylymdy damytpasaq, eshqashan ozyq memleket bola almaımyz. Ǵalymdarymyzdyń eńbegi — bizdiń bolashaǵymyzdyń irgetasy» degen tujyrymy berilgen.
Ári qaraı jalǵastyrsaq, 25 naýryzda áıgili «Qyz Jibek» fılminde Tólegen rólinde oınap, halqymyzdyń maqtanyshyna aınalǵan dańqty akter Quman Tastanbekovtiń týǵanyna 80 jyl tolady eken. Memleket basshysynyń osy bettegi «Mádenıet degenimiz — ulttyq sana-sezimdi jahandyq aýqymda nyǵaıta túsetin myqty tuǵyr» degen tujyrymy sahna sańlaǵynyń ult mádenıetine qosqan úlesimen úndesip tur.
Naýryzdyń sońǵy eki kúni Prezıdenttiń «Kópshiliktiń kóńilinen shyǵamyn dep týra sózden jańylýǵa bolmaıdy» jáne «Biz tól tarıhymyzǵa kókjıegi keń, tamyry tereń órkenıettik kózqaraspen qaraýymyz kerek» degen aqıqatty alǵa tartqan tujyrymymen aıaqtalady.
Aldaǵy sáýir aıynyń birinde arqaly kompozıtor, qazaqtyń birtýar uly Nurǵısa Tilendıevtiń týǵanyna 100 jyl tolady. Osy betten Memleket basshysynyń «Nurǵısa Tilendıev — qazaq mýzykasynyń úlken sheberi, onyń shyǵarmalary ulttyq mádenıetimizdiń altyn qoryna qosylady. Onyń mýzykasy halyqtyń júregine tereń jol tapty» degen joǵary baǵasyn oqımyz.
Mamyr aıy — Otan qorǵaý, Jeńis merekesimen baılanysty. Muny Prezıdent «Otanǵa qyzmet etý — árbir azamattyń paryzy» dep asqaq lebizben bildiredi.
Kúnparaqtyń taǵy bir betindegi «Biz kóshke ilesetin emes, kóshti bastaıtyn elderdiń qatarynda bolýymyz kerek» degen Memleket basshysynyń paıymdamasy ár adamǵa oı salsa kerek.
Qyrkúıek aıynyń sońǵy kúnderindegi paraqtan «Damyǵan elderdiń turǵyndary ár nárseniń qadirin biledi. Únemshildik olardyń ómir saltyna aınalǵan» degen joldardy oqýǵa bolady.
Shyǵý tarıhy grek eline baryp tireletin kúntizbeniń bastapqy mindeti, atqaratyn qyzmeti — táýliktiń ár kúnin este ustaý, tıimdi paıdalaný bolsa, búgingi san alýan, túrlishe keskindegi shyǵyp jatqan kúnparaqtar da negizinen osy maqsatty kózdeıdi.
Aqtóbede jaryqqa shyqqan kúntizbe aýdarmaly, jumys ústeli ústinde paıdalanýǵa arnalǵan. Bıylǵy jyldyń 22 naýryzynan kelesi jyldyń naýryzyna jalǵasatyn 365 kúndi qamtıtyn kúnparaqqa el Prezıdentiniń osynshama qanatty sózi berilgen.
Bul kúnparaq qaı-qaısymyzǵa da, bylaıynsha aıtqanda, jalpy jurtshylyqqa, sondaı-aq elmen etene qyzmet atqaryp otyrǵan memlekettik qyzmetshilerge de paıdaly ári yńǵaıly. Jalpy, qoǵamymyzdyń ár múshesine kómegi tıetin jaqsy kórneki qural desek, artyq emes.
Kúntizbeni oblys ákimi Ashat Shaharovtyń ıdeıasymen, tikeleı uıymdastyrýymen qurylǵan shyǵarmashylyq top júzege asyrdy.
Amanqos ORYNǴALIULY,
Qazaqstannyń qurmetti jýrnalısi
Aqtóbe