Kóne dáýirden beri ult rýhanııatynyń dińgegi bolyp kele jatqan aıtys óneri Túrkistan tórinde qaıta jańǵyryp, naýryz merekesine oraı alaman doda uıymdastyryldy. «Turan dala, Áz Túrkistan» atty respýblıkalyq aqyndar aıtysy elimizdiń ár óńirinen kelgen dúldúlderdi bir sahnada toǵystyrdy.
Alaman aıtysty aıtysker aqyn, QR Parlamenti Májilisiniń depýtaty, fılologııa ǵylymdarynyń doktory, professor, Qazaqstannyń eńbek sińirgen qaıratkeri, «Qurmet» ordeniniń ıegeri Amanjol Áltaı júrgizdi.
Jyr saıysyna elimizdiń túkpir-túkpirinen kelgen 14 aqyn qatysyp, sóz barymtasyna tústi. Qalamgerler tapqyrlyq pen tereń oıdyń kórinisin kórsetip, san ǵasyrlyq jyraýlyq dástúrdi jalǵady. Túrkistan tórinde ótken bul aıtys – tek jyr báıgesi ǵana emes, eldik murattardy dáriptegen rýhanı kesh boldy.
Aıtystyń ádil baǵasyn beretin qazylar alqasynyń quramynda sóz óneriniń maıtalmandary otyrdy. Olardyń ishinde qazaq aıtysynyń abyz aqsaqaly, «Qazaqstan aıtys aqyndary men jyrshy termeshilerdiń halyqaralyq odaǵynyń» basqarma tóraǵasy Júrsin Erman jáne elimizge tanymal aqyndar bar.
Qazylar alqasynyń sheshimimen sýyrypsalma ónerdiń júırikteri anyqtaldy. Bas júlde men 1 500 000 teńgeni jas aqyn Shuǵaıyp Sezimhan qanjyǵasyna baılady. Onyń ótkir tili, utymdy uıqasy, astarly oılary kórermenniń de, qazylardyń da kóńilinen shyqty.
Sóz báıgesinde júldeli oryndarǵa laıyq dep tanylǵan aqyndar:
• I oryn – Dáýren Aqsaqalov
• II oryn – Nurbek Bákir
• III oryn – úsh birdeı aqynǵa buıyrdy: Ásel Erejeqyzy, Muhtar Nııazov jáne Zylıha Naýryzalına
Júldesiz qalǵan aıtysker bolǵan joq.Qatysýshylardyń barlyǵyna 500 000 teńgelik sertıfıkattar tabystaldy.
Kópshilik asyǵa kútken bul aıtys ulttyq rýhtyń bıiktigin taǵy bir dáleldedi. Aqyndar eldiń túıtkildi máselelerin jyrlap, qoǵamdaǵy ózekti taqyryptardy qozǵady. Shabyt pen shyndyqtyń sharpysqan alamany kórermenderdi beıjaı qaldyrǵan joq.
Túrkistan tórinde ótken bul dúbirli doda el esinde uzaq saqtalary anyq. Ulttyq ónerimizdi ulyqtaǵan alaman aıtys keleshekte de dástúrli túrde jalǵasyp, qazaq sóz óneriniń mártebesin kótere beretini sózsiz.