Mereıtoılarǵa daıyndyq bastaldy

Bıyl elimiz úshin úlken mereıtoılyq merekelerge toly jyl. Ásirese, mamyr aıynda aıtýly merekeler atalyp ótiledi. Sonyń ishinde mereıtoılardyń negizgi deni elimizdiń bas qalasy – Astanada ótkizileri taǵy belgili. Keshe elordanyń bir top jaýapty qyzmetkeri osyǵan oraı arnaıy baspasóz málıhatyn ótkizip, birqatar túsinikter bere ketti. Astana qalasy mádenıet basqarmasy basshysynyń orynbasary Narıma Muhambetalına bıyl Otan qorǵaýshylar kúni jáne de Otan soǵysynyń Jeńisine 70 jyldyǵy atalyp ótkeli jatqandyǵyn erekshe atady. Onyń aıtýynsha, mamyrdyń 7, 8 jáne 9-ynda Astana qalasynyń mádenı oshaqtarynda elýden astam is-shara ótkiziledi. Sonyń ishinde eń mańyzdysy 7 mamyrda ótetin Áskerı sherý bolmaq. Qalalyqtar men kelgen qonaqtar úshin elor­danyń ashyq alańdarynda úlken konserttik baǵdarlamalar uıym­dastyrylyp, olarda otandyq estrada juldyzdary óz ónerlerin pash etetini atalmaı qalǵan joq. Al 8 mamyrda qaladaǵy eskertkishterge gúl shoqtaryn qoıý rásimderi oryn alatyny da alǵa tartyldy. N.Muhambetalına, sonymen qatar, Kongress-holda «Poklonımsıa k tem godam» atty konserttiń oryn alaryn da jetkizdi. Budan keıin sóz alǵan Astana qalasynyń jumyspen qamtý jáne áleýmettik baǵdarlamalar basqarmasy basshysynyń orynbasary Meıirlan Narynbetov ardagerlerdi pátermen qamtamasyz etý máselesi tolyq sheshimin tapqanyna nazar aýdartty. Onyń sózine qaraǵanda, 20 sáýirde sońǵy 6 páter bólinip, olar elimizdiń óńirlerinen qonys aýdarǵan ardagerlerge berilipti. Jáne de turǵyn úı jáne turmystyq jaǵdaı boıynsha júrgizilgen zertteý nátıjesinde 84 ardagerdiń baspanasyna túrli deńgeıdegi jóndeý jumystary júrgiziledi. Sondaı-aq, M.Narynbetov Máskeýdegi paradqa Qazaqstannan 6 UOS ardageri bararynan habardar ete ketti. 7 mamyrda elordadaǵy ótetin áskerı sherý kezinde birqatar shekteýlerdiń oryn alary da atalmaı qalǵan joq. Astana qalasy ishki ister departamentiniń ákimshilik polısııasy basqarmasynyń basshysy Baqytjan Malybaev tańǵy 6-dan túski 14:00-ge deıin Táýelsizdik dańǵyly boıymen B.Momyshuly kóshesinen Sh.Qaldaıaqov kóshesine deıin; Sh.Qaldaıaqov kóshesimen M3 kópiri jol aıyryǵynan bas­tap Obaǵan kóshesine deıin; R. Qoshqarbaev kóshesi boıymen B. Momyshuly kóshesinen bastap Sarykól kóshesine deıin jabylady. Aınakól kóshesi boıymen Sarykól kóshesinen bastap Nájimedenov kóshesine deıin kólik qozǵalysy tolyq toqtatylady. Sondaı-aq, 4-7 mamyr aralyǵynda Áskerı sherýge daıyndyqtyń ótýine baılanysty Táýelsizdik dań­ǵylymen A. Baıtursynov kóshesinen Nájimedenov kóshesi­ne deıin jabylatyn bolady. Son­dyqtan da qala jáne qala qonaq­tary bul jaıttarǵa túsinistikpen qaraýy kerek. Áskerı sherý ótkizi­letin kúni qalalyq ishki ister departamentiniń 3 myńǵa tarta qyz­metkerleri men 180 kóligi jumyl­dyrylary da alǵa tartyldy. Qalalyq kólik-avtomobıl jol­dary basqarmasy basshysynyń oryn­basary Ábdihamıt Tamabaev avtobýstar marshrýtynyń ózgeri­sin habarlady. Ol bul rette áskerı sherýlerdiń ótýine baılanysty tek jabylǵan kóshelerde júretin avtobýstardyń marshrýttary ózgererin alǵa tartty. Áskerı sherý bitisimen avtobýstar baıaǵy marshrýttarymen júre bastaıdy. Asqar TURAPBAIULY, «Egemen Qazaqstan».