Svetlana LIýBINA,
bank qyzmetkeri.
Elbasy Nursultan Nazarbaev ulyqtaý saltanatynda qazaqstandyqtar aldynda kóptegen mindetterdi sheshý úshin judyryqtaı jumylý, syrtqy faktordan tónetin syn-qaterlerge qarsy tura bilý qajettigin alǵa tartty. Shyndyǵynda, keleshekti oılaǵan eldiń basshysy aldaǵy kúnderi atqarylatyn jumystarynyń josparyn jasaqtaıdy. Osy oraıda Elbasynyń o bastan keleshekti boljaı biletin kóregendigine tánti bolyp kelemin. Máselen, 1997 jyly «Qazaqstan-2030» Strategııasyn usyndy. Sol kezde buǵan tańdana, tipti, kúmánmen qaraǵandar da kóp boldy. Alaıda, bastaǵan isin tııanaqsyz qaldyrmaıtyn, aıtqan ýádesinde turatyn Nursultan Nazarbaev ózi tizginin ustaǵan táýelsiz el ekonomıkasyn «Qazaqstan-2030» Strategııasynda kózdelgen baǵyttarmen damytýǵa belsene kiristi. Bul Strategııada kózdelgen mindetter 15 jylda oryndalyp, tabysty jetistikterge qol jetkizdik.
Al budan keıingi «Qazaqstan-2050» Strategııasynda da aıqyndalǵan mindetter men josparlar otandyq ekonomıkany álemdik básekege qabiletti etýdi, sóıtip, Qazaqstandy eń damyǵan 30 eldiń qataryna kiriktirýdi kózdedi. Osy Strategııa aıasynda elimizde údemeli ındýstrııalyq-ınnovasııalyq damý baǵdarlamasy qolǵa alyndy. Bul baǵdarlamanyń alǵashqy besjyldyǵynda ekonomıkanyń ár salasyn qarqyndy damytýǵa serpin bergen kásiporyndar kóptep iske qosyldy. Jańa jumys oryndary ashyldy. Buryn-sońdy elimizde shyǵarylmaǵan jańa ónimder halyqaralyq talapqa saı shyǵaryla bastady.
Jahandaný úderisi keń qanat jaıǵan saıyn syrtqy faktordan tónýi múmkin syn-qaterlerdiń bolatyndyǵy jáne daýsyz. Elbasy atap ótkendeı, álemdegi ózgerister ár memlekettiń, sonyń ishinde, bizdiń de aldymyzǵa tańdaý qoıary sózsiz, ıaǵnı qazirgi ekonomıkalyq órkendeýdi odan ári jedeldete túsý qajettigin qoıyp otyr. Mine, osy sebepten, Nursultan Nazarbaevtyń bes ınstıtýttyq reformadan quralǵan Ult josparyn usynýynyń aıryqsha mańyzy bar. Al ony iske asyrý tek Jańǵyrtý jónindegi ulttyq komıssııa músheleriniń ǵana mindeti degen ushqary oıdan aýlaq bolýymyz qajet.
Ult jospary – eldi órkendetip, asqar asýlardy baǵyndyrýdyń bas jospary. Ras, ondaǵy bes ınstıtýttyq reformany bir mezette qatar iske asyrý múmkin emes. Sol sebepten, ony kezeń-kezeńmen iske asyrý isine atsalysý qazaq jerin meken etken, aýasyn jutyp, sýyn ishken ár azamattyń tól mindeti bolǵany jón dep oılaımyn.
ATYRAÝ.