Nurǵısanyń ǵasyrlyq dastany

Degdar kom­pozı­tor­dyń mereıtoıyna arnalǵan konsertke Qazaqstannyń eńbek sińirgen qaıratkerleri – Svetlana Aıtbaeva, Azamat Jyl­tyrkózov, Jubanysh Jek­­senuly, Nurjan Jan­peıisov, halyqaralyq jáne respýblıkalyq baıqaýlardyń laýreattary Ferýza Rah­me­tova, Artýr Ǵabdıev, Rasýl Jar­­ma­­ǵambet, Nurǵalym Aman­­baı, Farhad Kóbeev, Naz­er­ke О́mir­baeva qatysyp, óner kór­­setti. Sonymen birge kom­pozıtordyń jıen nemeresi – Daıana Tilendıeva, Qazybek Qu­raıysh, N.Tilendıev atyn­daǵy memlekettik akade­mııa­­lyq, folklorly-etno­gra­fııalyq «Oty­rar sazy» orkestri, E.Rah­madıev atyn­da­ǵy memlekettik akademııa­lyq fılar­mo­nııa­nyń sımfo­nııalyq or­kes­tri, B.Baı­qadamov atyn­­­daǵy mem­­lekettik hor ka­­pel­­lasy qatysty.

– Ákem 70-ke tolǵanda mereıtoıy 1995 jyly Opera jáne balet teatrynda ótken. Ol kezde men 10 jasta bolatynmyn. Dúrkiretip toıyn ótkizip edik, bıyl da mereıtoılyq keshke kópten daıyndalyp keldik. Búgingi konsert óte erekshe boldy. Keremet ánshiler ákemniń áıgili ánderin naqyshyna kel­tirip oryndap shyqty. «Qus­tar áni», «О́z elim» ánderi bú­kil halyqqa taraǵan, tipti halyq ánderi bolyp ketkeni elge málim, – dedi N.Tilendıev atyn­daǵy akademııalyq fol­klor­ly-etnografııalyq «Oty­rar sazy» orkestriniń kórkemdik jetekshisi Dinzýhra Tilendıeva.

Kúıshi-kompozıtordyń ózi negizin salyp ketken «Otyrar sazy» orkestri N.Tilendıev­tiń 20-ǵa jýyq kúıleri men án­derin oryndady. Onyń bas dırıjeri jáne kórkemdik je­tekshisi – Qazaqstannyń eńbek sińirgen qaıratkeri Dinzýhra Nurǵısaqyzy. So­nymen qatar ekinshi dırıjer retinde Qazaq­stannyń eńbek sińirgen ártisi, «Qurmet» ordeniniń ıegeri, professor Jalǵasbek Begindikov óner kórsetti. Orkestr kon­sertti kompozıtordyń «Ata tolǵaýy» kúıimen bastap, odan ári saz ıesi ultymyzdyń belgili aqyn­darynyń óleńine jazǵan «Jan sáýlem», «Abaı tabıǵaty», «Esińe meni alǵaısyń», «О́z elim», «Qarlyǵashtar», «Kýá bol», «Darıǵa, dombyramdy bershi maǵan!», «Ákeme», «Áje­me», «Júregim meniń», «Aq qu­sym», «Alataý» ánderin orynda­dy.

Án-kúı óneriniń danyshpany qazaq halqynyń mýzyka mádenıetin álemdik deńgeıge kótergeni daýsyz. Búgin­de kom­pozıtordyń mereıtoıy IýNESKO-nyń sheshimimen halyq­­aralyq merekelik is-sha­ra­lar tizimine enip, álemdik aýqymda atalyp ótiledi.

«Álqıssa – Nurǵısa» – ǵasyr­lyq mereıtoılardyń resmı bastamasy, betashary ispetti. Tutas ǵumyryn óner jolyna arnaǵan daýylpaz Nurǵısa 500-den astam mýzykalyq eńbekti ultyna mura etse, onyń ishinde ánder men kúılerden bólek, ­balet, pesa, opera, fılmderge ja­zylǵan mýzykalar men ývertıýralar, elegııalar men poe­malar, kontatalary bar. Dara talant sonymen birge elimizdiń Al­tyn qoryna engen 20-dan as­tam kınotýyndyǵa mýzyka jazǵan.

Konsert barysynda kúı­shiniń «Mahambet», «Álqıssa», «Uly toı», «Aqqý» syndy elge tanymal kúıleri de oryndaldy. Kesh sońy kópshiliktiń birge shyrqaýymen «Qustar qaıtyp barady» ánimen qory­tyndylandy. Mádenıet jáne aqparat mınıstrliginiń qol­daýymen ótken konsertte sahnaǵa Prezıdent atynan yqy­las gúli ákelindi.