Erekshe qajettilikteri bar jastardy qoǵamdyq ómirge tartý mańyzdy. Olardyń ómirden óz ornyn tabýyna barynsha jaǵdaı jasalýy tıis. Bul týraly Almaty qalasy Jastar saıasaty basqarmasy basshysynyń orynbasary Almaz Keńesbaı óńirlik kommýnıkasııalar qyzmetinde málimdedi, dep habarlaıdy Egemen.kz.
El jastarynyń eń kóp bóligi turatyn Almatyda ınklıýzıvti orta qurýǵa jáne erekshe qajettilikteri bar jastardy qoldaýǵa baǵyttalǵan «Árbir adam mańyzdy» jobasyn iske asyrý jalǵasýda. Mamandardyń aıtýynsha, bul jobany memlekettik qoldaý sheshýshi ról atqarady. Sebebi Inklıýzıvti baǵdarlamalardy júzege asyrý – tek áleýmettik ádilettilik máselesi ǵana emes, sonymen qatar Almatynyń turaqty damýyna baǵyttalǵan memlekettik saıasattyń mańyzdy bóligi.
Almaz Keńesbaı, joba ornyqty ınstıtýsıonaldyq jáne qarjylyq qamtamasyz etý negizinde iske asyrylyp jatqanyn atap ótti.
«Memlekettik resýrstar materıaldyq-tehnıkalyq bazany nyǵaıtýǵa baǵyttalýda. Onsyz barlyq jastardyń ózin ózi júzege asyrý múmkindikterine teń qol jetkizýin qamtamasyz etý múmkin emes. Jobanyń mańyzdy bóligi – barlyq deńgeıdegi uıymdarmen ózara is-qımyl ornatý. Bul jekemenshik sektordan bastap, bilim berý mekemeleri men úkimettik emes uıymdarǵa deıin jalǵasady. Joba bir rettik bastama emes, Almatyda ınklıýzıvti qoǵam qurý strategııasynyń bir bóligi» deıdi ol.
Jobada áleýmettik ıntegrasııaǵa erekshe nazar aýdarylady. Turaqty monıtorıng júrgizilip, qajet bolǵan jaǵdaıda baǵdarlamaǵa aǵymdaǵy qajettilikterge sáıkes keletindeı ózgerister engizilmek.