L.N.Gýmılev atyndaǵy Eýrazııa ulttyq ýnıversıtetinde Abaı Qunanbaıulynyń 180 jyldyq mereıtoıy aıasynda «Abaı aınalasyndaǵy án dástúri» atty is-shara ótti, dep habarlaıdy Egemen.kz.
Abaıdyń aqyndyǵynan keıin, onyń mýzykalyq murasy keń aýqymda zertteletin taqyryp. Hakim saz ónerine de óleńge qoıatyn talappen qaraǵany anyq ańǵarylady. Onyń ánderindegi ózgeshe pishin, tyń yrǵaq, erek áýen qazaq halqynyń mýzykalyq talǵamyn jańa bıikke kóterdi. Al onyń Shákárim, Aqylbaı syndy rýhanı shákirtteri Abaıdyń án mektebin ózinshe jalǵastyryp áketti.
Fılologııa ǵylymdarynyń kandıdaty, professor Bolat Qorǵanbek Abaı ánderiniń rýhanı mazmunyn zertteýde jańasha kózqaras kerektigin jetkizdi.
«Eki túrli zaman men mekende ómir súrse de, rýhanı kemeldikke jetken jandardyń oı-pikiri bir arnada toǵysyp jatady. Bizdiń zertteý nysanymyzdaǵy Abaı da osyndaı jan. Ol án-óleńderin A. Pýshkınmen, M. Lermontovpen bir deńgeıde ıyqtasyp otyryp shyǵardy. О́miriniń sońǵy jyldarynda hakim nazaryn syrtqy álemge emes, óziniń ishki álemine qaraı aýdardy. Katarsıstik hál keshti. Sol sezimin «ýly sııa, ashy tilmen» jetkize bildi», dedi B. Qorǵanbek.
Mádenı jıynda Abaı jáne onyń shákirtteriniń el ishine taraı qoımaǵan birqatar ánderi oryndaldy.