Azııadaǵy ózara is-qımyl jáne senim sharalary jónindegi keńestiń (AО́SShK) qurylǵanyna bıyl 29 jyl toldy. Osy ýaqyt ishinde uıym aýqymdy is-sharalardy júzege asyryp, naqty nátıjelerge qol jetkizdi.
AО́SShK aldyn alý tásilin basshylyqqa alyp, memleketaralyq yntymaqtastyqty nyǵaıtý men úzdik tájirıbelerdi almasýǵa úles qosyp keledi. Uıym ishindegi jastar keńesiniń otyrystary – osy jumystyń mańyzdy bóligi. Jýyrda Samarqandta ótken jıynda jastardy radıkaldanýdan qorǵaý máselesi talqylandy. Sondaı-aq AО́SShK aıasynda jetekshi ýnıversıtetterdiń seriktestik jelisi qurylǵanyn atap ótkim keledi. Bul platforma akademııalyq almasýǵa, birlesken bilim berý baǵdarlamalaryn iske qosýǵa jáne jastardyń óńirlik kún tártibin qalyptastyrýǵa belsendi qatysýyna jaǵdaı jasaıdy.
Búginde ıadrolyq qarý qaýpi de qaıta ózekti bola tústi. Alaıda Ortalyq Azııa ıadrolyq qarýdan azat aımaq mártebesine qol jetkizgen keń aýqymdy óńir ekenin de atap ótý kerek. Almatylyq akt uıymnyń quryltaı qujaty retinde ıadrolyq qarýsyzdaný, kúsh qoldanýdan jáne qoldaný qaýpinen bas tartý, senimdi dıalog pen ózara is-qımyl arqyly berik baılanystardy nyǵaıtý qaǵıdattaryna berilgendikti bildiredi. Sol arqyly AО́SShK múshe memleketterge ár salada senim sharalaryn usyna otyryp, osy qaǵıdalarǵa súıenedi.
Ázerbaıjan ózin Ortalyq Azııanyń tarıhı bir bólshegi retinde sezinedi. О́tken jyldan bastap bul el keńeske tóraǵalyq etip keledi. Tóraǵalyqtyń urany – «Kúshti AО́SShK: ózara baılanys, sıfrlandyrý jáne turaqty ósim». Osy arqyly Ázerbaıjan uıym mıssııasyna adaldyǵyn, ári qaraı damytýǵa umtylysyn jáne buǵan deıingi tóraǵa-elderdiń jetistikterine súıenetinin kórsetti. Ázerbaıjannyń basty maqsaty – uıymnyń ınstıtýsıonaldyq negizin kúsheıte otyryp, onyń strategııalyq transformasııasyn júzege asyrý. Ol sondaı-aq áıelderdiń sheshim qabyldaý úderisine qatysýyn keńeıtý, turaqty kólik jáne qarjylyq baılanysty damytý, klımattyq kún tártibi aıasyndaǵy yntymaqtastyqty arttyrý sııaqty halyqaralyq basymdyqtardy alǵa tartyp otyr.
Bul bastamalardy tıimdi ilgeriletý aqparattyq qoldaýsyz múmkin emes. Sol sebepti biz uıymnyń resmı saıty men áleýmettik jelilerin damytyp, tartymdy ári mazmundy kontent jasap, jýrnalıstermen belsendi jumys istep kelemiz. Jýrnalıster pýlyn qalyptastyryp, múshe memleketterdegi medıa ókilderin túrli konkýrstar arqyly yntalandyramyz.
Osyǵan oraı, Ortalyq Azııa jáne jalpy Azııa óńiriniń medıasyn AО́SShK kún tártibin halyqqa jaqyn ári túsinikti etip jetkizýge barynsha atsalysýǵa shaqyramyn. Bul – mindet qana emes, sonymen qatar ortaq múmkindik.
Qaırat SARYBAI,
Azııadaǵy ózara is-qımyl jáne senim sharalary jónindegi keńestiń bas hatshysy