Men ótkenge emes, búgingi jýrnalıstıkaǵa toqtalǵym keledi. Qazirgi medıa úshin eń ózekti qundylyq – beıtaraptyq.
Búginde Batys medıasy kóbine solshyl ne ońshyl baǵytta habar taratady, al «Euronews» óz jolyn beıtaraptyq dep tańdaǵan. Árıne, bul – ońaı sharýa emes, óıtkeni ár jýrnalıstiń óz mádenı, áleýmettik bekgraýndy bar. Degenmen olar ár sát saıyn beıtaraptyqty ustanýǵa tyrysady.
Bul ustanym Ortalyq Azııa aımaǵyn qamtıtyn reportajdarǵa da tán. Biz aımaqqa qandaı da bir burmalanǵan kózqaraspen emes, shynaıy qyzyǵýshylyqpen qaraımyz. Biz oqıǵalarǵa baǵa bermeımiz, kerisinshe, ne bolyp jatqanyn kórsetkimiz keledi. «Euronews» tek problemalardy emes, óńirdiń múmkindikterin de kórsetýdi maqsat tutady.
Arna daıyndaǵan jobalar Ortalyq Azııa elderindegi serpindi ekonomıkalyq ózgeristerdi, mádenı jáne týrıstik áleýetti kórsetýge baǵyttalǵan. Bul – Eýropa kórermenine óńirdi tanytatyn úlken ekran ispetti.
«Euronews» JI-di qaýip emes, kerisinshe jýrnalıstıkany jaqsartýdyń quraly retinde qarastyrady. Biz jasandy ıntellektini qabyldap, ony jýrnalıstıkanyń sapasyn arttyrý úshin paıdalanǵymyz keledi. Bul tehnologııany qalaı qoldanatynymyz – ózimizdiń qolymyzda.
Sondaı-aq Ortalyq Azııa men Eýropa arasyndaǵy baılanystyń nyǵaıyp kele jatqanyn kórsetetin mysaldar jetkilikti. Jaqynda О́zbekstanda ótken EO-OA sammıtin yntymaqtastyqtyń jańa kezeńi deýge ábden bolady. «Euronews» bul úderisterdi jarııalap, dıalog ornatýǵa jáne túrli kózqarastardy kórsetýge atsalysýdy jalǵastyra bermek.
Osy óńirde de mıdyń kúshi, ınnovasııalyq áleýet jeterlik. Astanada bolyp jatqan nárselerdi kórgende ósip kele jatqan ekonomıkalyq qoǵamdy baıqaımyn. Keıde tipti keıbir Eýropa elderine qaraǵanda bul jaqta damý dınamıkasy, kózqarasy áldeqaıda pozıtıvti sııaqty kórinedi. Bul – óńirdi túsiný qıyn degen batystyq kózqaras emes, Batys Eýropanyń shynaıy qyzyǵýshylyǵynan týǵan kózqaras.
Bul sapar – meniń Astanaǵa ekinshi ret kelýim. Alǵash ret Dúnıejúzilik kóshpeliler oıyny kezinde aıaq bastym. Buryn men bul oıyn týraly estimegenime qatty uıaldym. О́ıtkeni jýrnalıster ádette bárin bilemiz dep oılaımyz ǵoı. Biraq men tańǵaldym. Bul tek sport nemese saıasat emes, mádenıet pen dástúrdiń qýatyn sezindirgen oqıǵa boldy. Sol kezde men bir jaýapkershilikti túsindim: Amerıkany túsiný úshin Eýropanyń ótken ǵasyrdaǵy jolyn bilý kerek. Sol sııaqty biz de óńirdi túsiný úshin aldymen onyń mádenıeti men tarıhyna tereń boılaǵanymyz abzal.
Klaýs ShTRÝNS,
«Euronews» telearnasynyń bas dırektory