Armenııada ótip jatqan Qazaqstannyń mádenı kúnderi aıasynda Erevan qalasynda Abaı Qunanbaıuly atyndaǵy saıabaqtyń saltanatty ashylýy ótti.
Aıtýly oqıǵa Memleket basshysy Qasym-Jomart Toqaevtyń Erevanǵa jasaǵan resmı sapary barysynda qol jetkizilgen memleketter basshylary arasyndaǵy kelisim nátıjesinde júzege asty.
Saltanatty is-sharaǵa Qazaqstan Respýblıkasynyń resmı delegasııasyn bastap barǵan QR Mádenıet jáne aqparat mınıstri Aıda Balaeva, Armenııa Respýblıkasynyń Bilim, ǵylym, mádenıet jáne sport mınıstri Janna Andreasıan, Erevan qalasy meriniń birinshi orynbasary Armen Pambýhchıan, Qazaqstan Respýblıkasynyń Armenııa Respýblıkasyndaǵy Tótenshe jáne О́kiletti Elshisi Bolat Imanbaev, sondaı-aq qos eldiń zııaly qaýym ókilderi, jergilikti turǵyndar men armıan astanasynyń qonaqtary qatysty.
Saıabaqtyń ashylý saltanatynda qysqasha sóz sóılegen Aıda Balaeva Armenııa bıligine jáne jobanyń júzege asýyna atsalysqan barlyq azamattarǵa alǵysyn bildirdi. Mınıstr bul oqıǵanyń eki el arasyndaǵy mádenı yntymaqtastyqtyń jańa kezeńin bildiretinin atap ótti.
– Biz búgin tarıhı oqıǵanyń kýási bolyp otyrmyz. Armenııa astanasynda qazaqtyń uly aqyny ári oıshyly Abaı Qunanbaıulyna arnalǵan saıabaq ashyldy. Qazaqstan Respýblıkasynyń Prezıdenti Qasym-Jomart Toqaev Armenııa Respýblıkasyna resmı sapary aıasynda Astana qalasyndaǵy bir kóshege armıan álipbıiniń negizin qalaýshy Mesrop Mashtos esimin berý týraly ekijaqty kelisim jasalǵany belgili. Búgin biz sol kelisimniń, dostyq pen tyǵyz mádenı baılanystardyń aıqyn kórinisine aınalǵanyn kórip otyrmyz, – dedi QR Mádenıet jáne aqparat mınıstri.
Saltanatty is-shara aıasynda Qazaqstan men Armenııa mınıstrleri eki el arasyndaǵy mádenı baılanystardyń tamyry tereńdep, bolashaqta odan ári nyǵaıa túsetininiń nyshany retinde saıabaqqa aǵash otyrǵyzdy.
Aıta keteıik, Abaıǵa arnalǵan eskertkishter, bıýstter men memorıaldyq taqtalar álemniń ondaǵan elinde – Bosnııa jáne Gersegovına, Germanııa, Grýzııa, Iran, Koreıa, Qytaı, Qyrǵyzstan, Vengrııa, Egıpet, О́zbekstan, Rýmynııa, Túrkııa, Túrikmenstan, Fransııa, Shveısarııa jáne Tatarstanda (Reseı) ornatylǵan.
Merekelik is-shara sońy Abaı Qunanbaıulynyń «Segiz aıaq» shyǵarmasyn oryndaǵan Qazaqstannyń dombyrashylar ansambli men Avan Mádenıet úıiniń jas ónerpazdarynyń konsertimen jalǵasty. Sonymen qatar qonaqtar qazaq halqynyń ulttyq mádenıetimen, zamanaýı ádebıetimen jáne dástúrli taǵamdarymen tanysty.
Búgin mınıstr Aıda Balaeva bastaǵan qazaqstandyq delegasııa Mesrop Mashtos atyndaǵy kóne qoljazbalar ǵylymı-zertteý ınstıtýty – Matenadaranǵa baryp, armıan halqynyń ejelgi jazba murasymen, onyń ishinde armıan álipbıiniń negizin qalaýshynyń qoltańbasy bar delinetin manýskrıpttermen tanysty.
Mádenı kúnder búgin Erevan qalasyndaǵy Aram Hachatýrıan atyndaǵy ortalyq konsert zalynda ótetin gala-konsertpen qorytyndylanady.
Rınatqyzy Ásemaı Álikeı Marǵulan atyndaǵy40 mektep-lıseıi11 synyp oqýshysy