Shoqtyǵy bıik, qaz moıyndy tulparlar aýyzdyqtaryn qarsh-qarsh shaınap, kópshilik kórermenniń aldyna shyqty. Quıryq-jaldary tógilgen bul sáıgúlikter О́skemenniń irgesindegi at sporty klýbynda ótip jatqan kórmege jetkizilgen. Bul joly jylqylardyń eń júırigi emes, kútimi men bitimine qaraı baǵalandy.
Sonymen qatar at sporty kesheninde sadaq atý, teńge ilý, aýdaryspaq syndy ulttyq sport túrlerinen de jarys boldy. Oblystyń ár óńirinen ákelingen 14 sáıgúlik tóreshiler men kórermenderdiń tańdaýyna usynyldy. Qazaqtyń jaby tuqymynan bastap, aqalteke, aǵylshyn, Orlov sáıgúlikterine deıin synǵa tústi. Bas júlde óskemendik Aleksandra Popovanyń arǵymaǵyna buıyrdy.
Bul is-sharada ıppoterapııa baǵytyndaǵy jumystar da tanystyryldy. «Tıtan» kesheninde 2009 jyldan beri erekshe balalar úshin atpen saýyqtyrý sabaqtary ótkizilip keledi. Qazir munda 130-dan astam bala ıppoterapııa qyzmetin alady. Atpen emdeý júıkege, bulshyq etke jáne psıhologııalyq jaǵdaıǵa oń áser etip, balalardyń densaýlyǵyn túzeýge kómektesedi.
Merekelik is-sharada óńir ónerpazdary án men kúıden shashý shashyp, kıiz úılerde ulttyq taǵamdar usynyldy. Qolóner buıymdarynyń kórmesi de uıymdastyryldy.
О́ńir ákimi Nurymbet Saqtaǵanov at sportynyń damýyna nazar aýdaryp, Shyǵys Qazaqstan shabandozdarynyń halyqaralyq jarystarda jetken jetistikterin erekshe atap ótti.
Oblys basshysy Nurymbet Saqtaǵanovtyń aıtýynsha, О́skemendegi «Tıtan» at sport klýbyndaǵy ıppoterapııa ádisi Shyǵys Qazaqstan oblysynyń basqa da aýdandarynda uıymdastyrylýǵa tıis. Bıyl jobany Rıdder qalasynda, Ulan aýdanynda júzege asyrý josparlanyp otyr.
– Qazaqstan Paralımpıada quramasynyń quramy jeti adamnan tursa, onyń altaýy bizdiń sportshylarymyz ekenin erekshe maqtanyshpen atap ótkim keledi. Jylda olar halyqaralyq jarystarda tek birinshi oryndardan kórinedi. Arnaıy Olımpıada baǵdarlamasyndaǵy at sporty erekshe maqtanyshqa laıyq. Bizdiń komanda Los-Andjelestegi Búkilálemdik jazǵy oıyndarǵa, Máskeýde ótken halyqaralyq jarystarǵa qatysyp, eki altyn, bes kúmis jáne bir qola medal jeńip aldy, – dedi oblys ákimi.
2009 jyldan bastap atalǵan klýb erekshe balalar densaýlyǵyn qalpyna keltirýdiń jańa baǵytyn sátti júzege asyryp, ıppoterapııa ádisin qoldaný arqyly saýyqtyrý sabaqtaryn ótkizetin ádistemelik ortalyqqa aınaldy.
– Búgingi saıystyń maqsaty – adamdardyń atqa degen qyzyǵýshylyǵyn kórsetý. At baptaýdaǵy mádenıetti qalyptastyrý, sondyqtan talaptar sporttyq daıyndyqqa emes, arǵymaqtyń kútimine baılanysty qoıylǵan. Jal-quıryǵy taralǵan, tynysy ashylǵan sáıgúlikter jeńiske jetedi, – dedi oblystyq at sporty federasııasynyń dırektory Ekaterına Rýdenko.
Uıymdastyrýshylardyń aıtýynsha, arǵymaqtardyń mundaı kórmesi dástúrli túrde uıymdastyrylyp turýy múmkin. Bıyl О́skemen óńiriniń tulpary top jarsa, keler jyly basqa jaqtyń jylqysy jeńiske jetýi múmkin.
О́skemen