Qazaqstan halqy Assambleıasynyń otyz jyldyq mereıtoıy – elimizdiń qoǵamdyq-saıası ómirindegi aıtýly oqıǵa, barshamyzǵa ortaq mereke. Assambleıa – beıbitshilik pen tatýlyqtyń, birlik pen kelisimniń shynaıy rámizi, dostyq mekeni.
Búginde álemniń kóptegen elinde turaqsyzdyq, ultaralyq jáne dinaralyq qaqtyǵystar oryn alyp jatyr. Osyndaı kúrdeli kezeńde elimizdegi birlik pen kelisimdi saqtap, ony odan ári nyǵaıtyp kele jatqan Assambleıa ınstıtýtynyń mańyzy zor. Bul uıym tek basqosýlar men is-sharalarmen shektelip qalmaı, el ishindegi túrli etnostardyń mádenıetin saqtap, damytýǵa, urpaq boıyna ózara qurmet pen tózimdilik sııaqty qundylyqtardy sińirýge úlken úles qosyp otyr.
Adamgershilikke baýlý, tatýlyq pen túsinistikke tárbıeleý – uzaq ári kúrdeli úderis. Ony júzege asyrýda Assambleıanyń atqaryp otyrǵan jumysy orasan. Túrli etnos ókilderi bir shańyraqtyń astynda tatý-tátti ómir súrip, ortaq maqsattarǵa umtylyp jatqan elde ǵana shynaıy turaqtylyq pen órkendeý bolady. Sondyqtan Assambleıa – elimizdiń bereke-birliginiń naqty kepili.
Men elimizdegi afrıkalyq etnomádenı ortalyqtyń tóraǵasymyn. Bizdiń uıym elimizge qyzyǵýshylyq tanytyp, osynda kelip jatqan sheteldikterge, sondaı-aq qazaq tilin úırengisi keletin ózge el ókilderine qoldaý kórsetedi. Biz tegin kýrstar uıymdastyryp, qazaq tilin úıretemiz. Bul sabaqtar aptasyna bir ret ótedi. Oǵan aǵylshyn tildiler de, orystildi azamattar da qatysyp júr. Biz olarǵa qazaq tilin ózderi jaqsy túsinetin til arqyly úıretýge tyrysamyz. Sebebi tildi úırený – tek bilim alý emes, bul jergilikti halyqqa, onyń tili men mádenıetine qurmet kórsetý.
Bizdiń bastamamyz – elimizde turatyn árbir azamattyń Otanǵa degen súıispenshiligin arttyrýǵa baǵyttalǵan. Qazaq tilin úırenýge qyzyǵýshylyqtyń artýy – bul elimizdegi beıbit ómir men ózara túsinistiktiń naqty kórinisi. Al mundaı jaǵdaıdyń qalyptasýyna Qazaqstan halqy Assambleıasy syndy ınstıtýttardyń yqpaly zor ekeni sózsiz.
Jalpy aıtqanda, qazaq mádenıeti men memlekettik tilge degen qurmet ózge etnostardy biriktiredi. Meniń túp-tamyrym Nıgerııada jatqanymen, Almatyda óstim. Búginde qazaq tilinde erkin sóıleımin. Aǵylshyn tilin de bilemin, biraq qazaq tili de meniń ana tilimdeı bolyp ketti. Qazaqstandy ózimniń týǵan úıimdeı kóremin. Qazaq halqynyń qonaqjaılyǵy talaılardy tánti etip júr. Qysqasy, sheteldikter úshin elimizde ózin jaıly sezinýge barlyq jaǵdaı jasalǵan. Iаǵnı mundaǵy adamdardyń ashyq-jarqyn minezi men meıirimdiligi meni árdaıym qýantady.
Denıel DJEIMS,
«Afrıkalyq mádenı ortalyq» QB tóraǵasy, QHA múshesi