Birneshe býyn aǵa tutatyn, jurt abyz dep sanaıtyn akademık Seıit Asqaruly Qasqabasov ómirden ótti degen qaraly habar eshkimge ońaı tımedi...
Bir-birimen tyǵyz baılanysty bolsa da, úlken ǵalym ataný – bir basqa da, ǵylymdy basqarý bólek álem. Ǵylymdy qara nardaı júgin arqalaǵan, qyr-syryn biletin, erekshelikterin tereń uǵatyn talǵampaz tulǵa ǵana basqara alady. Osyndaı úlgidegi sırek talanttyń biri – Ulttyq ǵylym akademııasynyń akademıgi Seıit aǵa Qasqabasov edi.
Seıit Asqaruly Astanaǵa alǵash qonys aýdarǵan 1997 jyldan beri L.N.Gýmılev atyndaǵy Eýrazııa ulttyq ýnıversıtetinde ǵylymdy basqarýdyń qalyptasqan júıesin sapalandyrýǵa eleýli úles qosty.
Azamattyń ómirlik ustanymy bolady. Seıit aǵanyń jaqsy ǵalymdyǵyna qosa, isker uıymdastyrýshy da bolýy onyń týabitti alǵyrlyǵynan, eńbekqorlyǵynan dep bilemin.
Qazaq KSR Ǵylym akademııasy Qoǵamdyq ǵylymdar bólimshesiniń ǵalym-hatshysy, sodan soń Qazaqstan kompartııasy ortalyq komıteti men Qazaqstan Respýblıkasy Prezıdenti Ákimshiliginiń jaýapty qyzmetkeri, keıin Joǵary attestattaý komıssııasynyń tóraǵasy laýazymynda júrgende ǵylymı jumystaryn, sonyń ishinde folklortaný men ónertanýdy nazarynan qaǵys qaldyryp kórmegen birtýar tulǵa boldy.
Tarıh aqtańdaqtaryn qalpyna keltirýge atsalysýdy abyroıly paryz dep sanaǵan Seıit Asqarulyn tarıh, ádebıet, mádenıet salasyndaǵy áriptesterimen birge kúlli zııaly qaýym jaqsy bildi.
Almatydaǵy Ádebıet ınstıtýty basshylyǵyna shaqyrylyp, on jyl sonda tabysty eńbek etken soń, qara shańyraǵym dep ýnıversıtetimizge qaıta oralǵan Seıit Asqaruly qazaq ádebıeti kafedrasynyń tizginin ustady. Ol bir kezde ózi ashqan «Eýrazııa» ǵylymı zertteý ortalyǵy, Shyǵystaný fakýlteti jumysyna aqyl-keńesin berip júrdi.
Seıit Qasqabasovtyń azamattyq, ǵalymdyq kelbeti degende, ol gýmanıtarlyq ǵylym álemine eseli eńbek etti.
Sondaı-aq qazaq folklortaný ǵylymynda óz mektebin qalyptastyrdy. Seıit Qasqabasovtyń esimi men eńbegi Qazaqstanda ǵana emes, shetelde de zor iltıpatpen atalady.
Azamattyq aıqyn ustanymymen, qajyrly eńbegimen tarıh, folklor, ádebıet, mádenıet pen rýhanııat salalarynyń ósip-órkendeýine ólsheýsiz úles qosqan akademık el-jurttyń qurmetine bólendi. Sońyna tom-tom ǵylymı eńbegi men laıyqty shákirtterin qaldyrdy.
Seıit Qasqabasovtyń ǵıbratty ǵumyry men jarqyn beınesi jurtshylyq jadynda árdaıym saqtalady dep senemin.
Erlan Sydyqov,
akademık