Sý resýrstary jáne ırrıgasııa mınıstrligi «Qazsýshar» RMK-ny barlyǵy 757 birlik tehnıkamen jabdyqtaýdy kózdep otyr. Bul jumys bes kezeń boıynsha júzege asyrylady, dep habarlaıdy Egemen.kz.
Búgingi tańda alǵashqy tórt kezeń aıasynda 636 tehnıka jetkizý jóninde kelisimsharttar jasaldy.
Atalǵan kelisimderge sáıkes, tehnıkalar elimizdiń 14 oblysyndaǵy «Qazsýshar» kásipornynyń 17 fılıalyna jetkizilmek. Al sońǵy, besinshi kezeńge qatysty konkýrs rásimderi áli ótkizilip jatyr.
Sý resýrstary jáne ırrıgasııa vıse-mınıstri Erbolat Ibraıhanovtyń aıtýynsha, fılıaldardy jańa tehnıkalarmen qamtý sý sharýashylyǵy nysandaryn tazalaý men gıdrotehnıkalyq qurylystardy qaıta qalpyna keltirý jumystaryn jedeldetýge sep bolady. Sonymen birge, bul sý tasqynynyń aldyn alý sharalarynyń tıimdiligin arttyra túsedi.