«Golden Compass Capital» AQ Turar Rysqulov aýdany aýmaǵyndaǵy altyn óndirý jumysyn 2012 jyly bastady. Jyldar óte kele «Kókqııa» sekildi birqatar ken oryndarynyń barlaý blokterinde barlaý jumysyn jandandyrdy. 2019 jyly barlaý bloktaryn bólý jónindegi konkýrsqa qatysyp, «Taldybulaq», «Vostochnyı», «Taldybulaq zolotoı», «Qaıyńdy» sekildi bloktardy barlaýǵa arnalǵan lısenzııany ıelendi.
2023 jyly jalpy quny 5 800 mln teńgeni quraıtyn 343,8 kılo altyn óndirse, ótken jyly jalpy quny 6 931,2 mln teńgeni quraıtyn 434 kılo mejesin baǵyndyrdy. Kásiporyn sondaı-aq qaıyrymdylyq is-sharalaryna da belsendi qatysady. Pandemııa kezinde «Áýlıe-Ata paryzy» qoǵamdyq qoryna – 5 mln, «Elaı Qulan» múmkindigi shekteýli jandardyń qoǵamdyq birlestigine – 600 myń, aýdandyq ortalyq aýrýhanaǵa 12 mln teńge qarajat aýdardy. Kópbalaly otbasynyń úıin jóndeýden ótkizýge de qolushyn sozdy. Shaǵyn fýtbol alańyna qajetti tor, jasandy jabyn alý úshin 5 mln teńge aýdarǵan.
«Budan bólek Jarysý aýylyna aýyzsý uńǵymasyn salý úshin 10 mln teńge qarajat berdi. Aıta bersek, altyn kenin óndirýmen aınalysatyn iri kásiporyn basshylyǵynyń sharapatyn kórgen túrli uıymdar da, jekelegen azamattar da az emes», deıdi aýdandyq kásipkerlik bóliminiń basshysy Saqtasyn Tastanov.
Irgeli kásiporynda eńbek etetin jumysshylar eki sanatqa bólinedi. Olar eńbegine qaraı nápaqa alyp júr. Jumysshylardyń ortasha jalaqysy 242 087 teńgeni qurasa, kompanııa qyzmetkerleri 341 248 teńge eńbekaqy alady.
Jambyl oblysy,
Turar Rysqulov aýdany