7 mamyr – Otan qorǵaýshylar kúni men Uly Jeńistiń 80 jyldyǵyna oraı ótken saltanatty sharada Memleket basshysy Qasym-Jomart Toqaev halqymyzdyń erlik dástúri men armııanyń el qaýipsizdigin saqtaýdaǵy róli týraly mazmundy málimdeme jasady, dep habarlaıdy Egemen.kz.
Prezıdenttiń aıtýynsha, halqymyzdyń jaýyngerlik dástúri ǵasyrlar boıy jalǵasyp keledi.
«Altyn Orda, Qazaq handyǵy kezindegi bahadúr babalarymyz keń baıtaq jerimizdi qorǵap, keıingi býynǵa amanat etti. Olardyń búgingi izbasarlary qazaqtyń memlekettiligin qas qaqpaı kúzetip tur», dedi Memleket basshysy.
Qasym-Jomart Toqaev Qarýly Kúshterdiń el birligi men beıbit ómirdi qorǵaýdaǵy mańyzyn erekshe atap ótti. Búginde Qazaqstan sarbazdary Birikken Ulttar Uıymynyń bitimgerlik mıssııalaryna qatysyp, álemdik turaqtylyqqa óz úlesin qosyp keledi.
«Bul – búkil álemdegi Qazaqstan armııasyna degen zor senim», dedi Prezıdent.
Memleket basshysy elimizdiń qorǵanys qabiletin nyǵaıtý basty mindet ekenin aıtyp, armııany jańǵyrtý boıynsha naqty jumystar atqarylyp jatqanyn jetkizdi.
«Parlament tıisti zań qabyldady. Memleket áskerı qyzmetshilerge jáne azamattyq qorǵanys salasynyń qyzmetkerlerine árdaıym qoldaý kórsetedi», dedi Qasym-Jomart Toqaev.
Memleket basshysy armııa qýaty tek tehnıkalyq jabdyqpen emes, jaýyngerlik rýh pen temirdeı tártippen nyǵaıatynyn aıtty.
«Biz ozyq oıly ult retinde zań men tártipti bárinen bıik qoıatyn boldyq. Ár azamattyń boıynda Otanǵa degen adaldyq pen ádildik bolýǵa tıis», dedi Toqaev.
Sóz sońynda Memleket basshysy barsha azamattardy Ádiletti, Qýatty, Qaýipsiz jáne Taza Qazaqstan qurý jolynda birigýge shaqyryp: «Rýhymyz myqty, memlekettiligimiz máńgi bolsyn! Kók Týymyz bıikte jelbiresin! Uly Jeńistiń 80 jyldyǵy qutty bolsyn!», dep qorytyndylady.