Astanadaǵy Ulttyq mýzeıde «Qazaqstan – maıdan arsenaly» atty taqyryppen Ekinshi dúnıejúzilik soǵys kezinde tyldaǵy jurttyń beınetin beıneleıtin kórme ótti.
Kórmege Ulytaý oblysynyń Jezdi kentindegi mýzeıden 40-tan astam eksponat ákelinip, Ulttyq mýzeıde bir aı boıy kelýshiler nazaryna usynylyp otyr. Bultartpas faktiler men resmı qujattarǵa negizdelgen tarıhı taǵylymy mol kórmeden maıdan kezindegi ómirdiń sýretin kórýge bolady.
Kórmeniń ashylýynda sóz alǵan Ulttyq mýzeı dırektory Berik Ábdiǵalıuly Jezdiniń kent bolyp qurylý tarıhy týrasynda az-kem málimet aıtty.
– Soǵys jyldary bul tóńirekten úlken marganes-jez kenishi tabylǵan. Ýkraınada-ǵy marganes óndirisiniń oshaqtaryn fashıstik rejimge berip qoıǵan KSRO úshin bul tyǵyryqtan shyǵaratyn týra jol edi. О́ıtkeni oq pen snarıadtan qorǵaıtyn qurysh qursaý jasaý úshin marganes qajet. Sol kezde Qanysh Sátbaevtyń bastaýymen Jezdidegi marganes ken orny ashylyp, ónimi maıdanǵa qursaýly tank bolyp attanyp jatty. Osylaısha, Jezdi dalasy jeńiske ólsheýsiz úles qosqan bolatyn, – dedi Berik Ábdiǵalıuly.
Mýzeıdiń bir buryshynan oryn tepken shaǵyn kórmeniń ishinde artıllerııalyq snarıadtyń alyp gılzalary kózge ottaı basylady.
– Bul buryshqa zattaı eksponattarmen birge Jezdini marganes óndirisiniń oshaǵy etip damytýǵa túrtki bolǵan resmı qujattar, «Za med» degen atpen jalǵyz bet bolyp, kún saıyn shyǵyp turǵan jarshy gazettiń alǵashqy nusqalary sııaqty 1941–1945 jyldardy qamtıtyn dúnıelerdi alyp keldik. Eldiń bir túkpirinde jatqan mýzeıdiń murasyn Astana tórine aldyryp, búkil jurtshylyqtyń nazaryna usynýǵa múmkindik bergen Ulttyq mýzeı basshylyǵyna alǵysymyz sheksiz, – dedi Jezdi kentindegi Máken Tóregeldın atyndaǵy taý-ken jáne balqytý isi tarıhy mýzeıiniń basshysy Zeıpin Qazanbaeva.