Jol qurylysy josparǵa saı júrýde

Keshe Ortalyq kommýnıkasııalar qyzmetinde Investısııalar jáne damý mınıstrligi Avtokólik joldary komıteti tóraǵasynyń orynbasary Amangeldi Bekov pen «QazAvtoJol» UK» AQ basqarma tóraǵasy Ermek Qızatov baspasóz máslıhatyn ótkizdi. Onda «Nurly Jol» baǵdarlamasyn júzege asyrý sharalary sóz boldy. Elimizdiń kelesi kezeńdegi damýynda basty qujat bolyp tabylatyn «Nurly Jol» memlekettik baǵdarlamasy boıynsha 2015-2019 jyldary respýblıkada 11 avtokólik jolynyń jobasy júzege asyrylady eken. Nátıjesinde, 7 myń shaqyrymnan astam jol qaıta jańǵyrtylatyn kórinedi. Osyny aıtqan komıtet tóraǵasynyń orynbasary, ár ba­ǵytty atap ótti. – «Nurly Jol» baǵ­dar­lamasy aıasynda «Batys Eýropa – Ba­tys Qytaı» jobasyn aıaqtaý, «Or­talyq – Ońtústik», Ortalyq – Shy­ǵys», «Ortalyq – Batys», «Almaty – О́skemen», «Qyzylorda – Jezqazǵan-Qaraǵandy», «Astana – Petropavl», «Oral – Kamenka», sondaı-aq, «Astana qalasynyń ońtústik aınalma joly», «Jetibaı – Jańaózen» jáne «Úsharal – Dostyq» jobalary qolǵa alynady. Atalǵan jobalardyń jalpy quny 2,4 trln. teńgeni quraıdy. Sonyń arqasynda, jalpy alǵanda 7 myńnan astam shaqyrymdy qaıta jańartý jos­parlanýda. Osy maqsattarǵa ulttyq qordan 2015-2016 jyldarǵa 301 mlrd. teńge bólinetin bolady», dedi A.Bekov. Bularmen birge, 1 trln. teńge nemese 5,5 mlrd. dollar kóleminde bolatyn qarjy jóninde mınıstrlik aldyn ala kelissózder júrgizip, jyl sońyna deıin 12 kelisimge qol qoıýdy josparlapty. «Atap aıtsaq, Ortalyq-Ońtústik jobasy boıynsha qaryzǵa alynǵan qarajatqa Qaraǵandydan bastap Kýrtovqa deıin jol salynady. Buǵan 2,6 mlrd. dollar kóleminde Dúnıejúzilik bank pen Eýropalyq banktiń qaryzy jumsalady. «Ortalyq – Batys» jobasyna Dúnıejúzilik bank, Islam banki men Azııa damý bankiniń qarajattaryn tartý kózdelgen. Shamamen 1,5 mlrd. dollar kóleminde qarjy tartylady. «Aqtóbe – Atyraý – Astrahan» jobasy boıynsha 960 mln. dollar kóleminde Azııa damý banki men Islam bankinen ınvestısııa tartý kózdelýde. «Jetibaı – Jańaózen» jobasyn júzege asyrý úshin 140 mln. dollar kóleminde Azııa damý bankinen, al «Uzynaǵash – Otar» jobasyna Dúnıejúzilik bank­ten 213 mln. dollar kóleminde qarjy tartylady. Osy jobalar boıynsha bıyl tehnıkalyq negizdeme ázirlenip, qurylys jumystaryn kelesi jyldyń ekinshi toqsanynda bastaý kózdelip otyr», dedi komıtet tóraǵasynyń orynbasary. Osy kezde qurylys bastalyp ketken Temirtaý – Qapshaǵaı tas jo­lyn­daǵy 1000 shaqyrym joldy jóndep, jańartý jumystary 2019 jy­ly tolyq aıaqtalady eken. «Nurly Jol» baǵ­dar­lamasy boıynsha ınfra­qu­ry­lymdy damytý jónindegi ulttyq operator «QazAvtoJol» kompanııasy kele­si baǵyttar boıynsha jumystar atqa­ryp jatyr. «Astana –Almaty» baǵy­ty boıynsha, Qaraǵandy, Temirtaý, Bal­qash, Qapshaǵaı qalalary arqy­ly ótetin «Astana – Almaty» tas joly­nyń 1 282 shaqyrymynda jóndeý jumys­tary júrgizilýde. Bul tas jol 4 jáne 6 jolaqty 1-shi kategorııa­ly joldar qataryna jatatyn bolady. Jyl sońynda Astana men Temir­taý, sondaı-aq, Almaty men Qapsha­ǵaı qalalarynyń arasyndaǵy bir-bir jolaqty paıdalanýǵa beremiz. Jol­dyń ekinshi jolaǵy kelesi jyly aıaqta­lady. Shamamen 1000 shaqyrymdy quraı­tyn Temirtaý qalasynan Qap­shaǵaı­ǵa deıingi aýmaqtyń jobalyq-smeta­lyq qujattamasy ázirlenip jatyr. Joba respýblıkalyq bıýdjet pen Dúnıe­júzilik banktiń qaryzy esebinen qarjy­lan­dyrylady», dedi basqarma tóraǵasy E.Qızatov. Nurbaı ELMURATOV, «Egemen Qazaqstan».