Astanada erkin kúresten el kýbogi óz máresine jetti. Bıyl kúzde Zagrebte jalaýy jelbireıtin álem chempıonatynyń joldamalary sarapqa salynǵan jarysqa Nurqoja Qaıpanov pen Rızabek Aıtmuhannan basqa balýandardyń barlyǵy qatysty.
Elimizde erkin kúresten básekelestik óte kúshti. Elorda tórinde ótken jarysta soǵan taǵy bir kóz jetti. Máselen, osy kúnge deıin 125 kg salmaq dárejesiniń bas balýany sanalyp kelgen Iýsýp Batyrmurzaev shırek fınalda Álisher Erǵalıden oısyraı utyldy. Sóz joq, Álisher – myqty balýan. Azııa chempıonatynda tórt ret jeńis tuǵyryna kóterilip, Tokıo, Parıj olımpıadalaryna qatysty. Degenmen Jambyl oblysynyń ókili bul tabystarǵa 97 kg salmaqta qol jetkizdi. Al asa aýyr salmaqtyń óz myqtylary bar. Soǵan qaramastan Á.Erǵalı Batyrmurzaevty qos jaýyrynymen jerge qadady. Fınalda aqmolalyq Nursultan Azovtan aılasyn asyrdy. Úshinshi orynǵa Qaraǵandy oblysynyń qos alyby – Serik Baqythanov pen Álıhan Qusaıynov taban tiredi.
Álem chempıonatynyń qola, Azııa oıyndarynyń kúmis júldegeri, qurlyqtyń eki dúrkin chempıony Danııar Qaısanov birden eki salmaq dárejesine joǵarylaýdy jón kórgen eken. Onyń bul sheshimi durys bolmaǵany báseke barysynda anyq baıqaldy. 86 kg salmaqta saıysqa túsken ataqty balýan alǵashqy aınalymnan keıin-aq kórermender qataryna qosyldy. Danııar Bıbarys Nurylaulyna jol berdi. Aqtóbeniń sportshysy almatylyq Nursultan Ábdihalyqpen birge qola medaldy qanaǵat tutsa, altyn, kúmis medaldardy Bolat Saqaev (Atyraý) pen Nurjan Isaǵalıev (BQO) ıelendi.
57 kg salmaqtyń úzdigi, Azııanyń úsh dúrkin júldegeri jambyldyq Rahat Qaljanovtyń bul joly júldegerler qatarynan kórinýge qarym-qabileti jetpedi. Oıda-joqta óziniń komandalyq áriptesi Ádilet Álmuhamedovke jol berdi. Ádilet fınalda Abzal О́kenovti (Astana) súrindirdi. Odan keıingi oryndarda – Vagıf Gasanov (Almaty oblysy) pen Dáýlet Ámirhan (BQO).
65 kg salmaqta Nachyn Kýýlar top jardy. Ol – Shymkent qalasynyń atynan synǵa túsip júrgenimen, taza legıoner. Týǵan jeri – Tyva. Jasy da 30-ǵa taıap qalǵan. Byltyr ony bizdiń bapkerler Ammandaǵy Azııa chempıonatyna apardy. Ol jaqta Kýýlar oısyraı utyldy. Astanada Nachyn aldyna jan salmady. Fınalda Meırambek Qartbaıdy (Aqtóbe) bir ǵana upaı aıyrmashylyǵymen utty. Bekzat Sybanbaı (ShQO) men Sherhan Ábil (Almaty) úzdik úshtikti túıindedi. 97 kg salmaqta Bekzat Úrkimbaıǵa (Astana) teń keler eshkim tabylmady. Aqtyq básekede ol Rýstam Ekajevty (Astana) eńserdi. Nurdáýlet Bekenov (ShQO) pen Ákejan Aıtbekovke (Jetisý) qola medal buıyrdy.
Kelesi kúni taǵy bes salmaq dárejesinde jeńimpazdar men júldegerler anyqtaldy. 61 kg salmaqta Ádil Ospanov (Qaraǵandy) ozdy. Sheshýshi saıysta ol Asyl Aıtaqynnan (Almaty oblysy) aılasyn asyrdy. 70 kg salmaqtyń fınalynda Maııs Álıev (Mańǵystaý) Meıirjan Áshirovten (Jambyl) basym tústi. Bul básekeniń taǵdyryn bir ǵana upaı sheshti. 74 kg salmaqta Álibek Ábdiqasymovtyń (Almaty oblysy) asyǵy alshysynan tústi. 79 kg salmaqtyń bas júldesin 27 jastaǵy Dáýlet Ergesh (Jambyl) pen 38 jastaǵy Nurlan Bekjanov (Astana) ózara sarapqa saldy. Jastar arasyndaǵy álem birinshiliginiń kúmis júldegeri eresekter arasyndaǵy álem chempıonatynyń fınalısin utty. 92 kg salmaqta Azamat Dáýletbekovtiń (ShQO) mereıi ústem boldy. Ataqty balýan fınalda Samır Dýrsýnovty aıqyn basymdyqpen utty.
Jalpykomandalyq esepte Jambyl oblysynyń jampozdary aldaryna jan salmady. Almaty qalasynyń apaıtósteri ekinshi oryn alsa, úzdik úshtikti Shyǵys Qazaqstan oblysynyń balýandary túıindedi.