Týrızm jáne sport mınıstrligi Qazaqstanda gıdterdiń qyzmetin júıeleý úshin sıfrlyq modýl engizilgenin málimdedi, dep jazady Egemen.kz.
Bul modýl arqyly paıdalanýshylar gıdter týraly naqty, tekserilgen aqparatty ala alady. Al gıdter ózderiniń kásibı biliktiligin rastap, testileýden ótip, qosymsha bilim alý múmkindigine ıe bolady. Tirkeýden jáne testileýden sátti ótken gıdterge olardyń mártebesi men kásibı daıarlyǵyn rastaıtyn biryńǵaı standarttaǵy resmı beıdj tabystalady. Qazirgi tańda mundaı beıdjdi 93 gıd ıelenip otyr. Bilikti mamandardy qoldaý bastamasy aıasynda elimiz boıynsha 41 týrıstik nysanǵa jeńildikpen kirý múmkindigi usynylady. Jeńildik gıdter men olardyń alyp júretin uıymdastyrylǵan týrıstik toptaryna arnalǵan. О́ńirler bólinisi boıynsha mundaı nysandar qatarynda: Almaty oblysy – 17 nysan, onyń ishinde «Kólsaı kólderi», «Sharyn» shatqaly, «Ile-Alataý» ulttyq parki, sondaı-aq mýzeıler men qoryqtar; Astana qalasy – 9 nysan, sonyń ishinde «Báıterek» monýmenti, «Astana Opera» teatry, Ulttyq mýzeı; Almaty qalasy – «Shymbulaq» kýrorty, Á. Qasteev atyndaǵy Memlekettik óner mýzeıi, «Ǵylym ordasy» mýzeıi jáne Ortalyq memlekettik mýzeıde jeńildik qarastyrylǵan; Soltústik Qazaqstan oblysy – «Botaı» mýzeı-qoryǵy; Jetisý oblysy – «Altyn-Emel» ulttyq parki men Jetisý Alataýy memlekettik tabıǵı parki bar.