Elordadaǵy L.N.Gýmılev atyndaǵy Eýrazııa ulttyq ýnıversıtetinde asa kórnekti jýrnalıst, Qazaqstannyń Halyq jazýshysy, qoǵam qaıratkeri Sherhan Murtazanyń aýdıtorııasy ashyldy. Saltanatty rásimge Senat pen Májilis depýtattary, memleket jáne qoǵam qaıratkerleri, elimizdiń jýrnalıstıka salasynyń ardagerleri, belgili aqyn-jazýshylar men buqaralyq aqparat quraldarynyń ókilderi, sonymen qatar sheteldik seriktes joǵary oqý oryndarynyń ǵalymdary qatysty.
Sherhan Murtazanyń otandyq jýrnalıstıka men ádebıettiń damýyna qosqan úlesin aıǵaqtaıtyn bul aýdıtorııa osy oqý ornynyń ǵana emes, elordanyń kásibı-ıntellektýaldyq ortalyǵy bolmaq.
«Belgili qaıratker Sherhan Murtaza atyndaǵy aýdıtorııanyń ashylýy – búkil qoǵamǵa oı salatyn, úlgi bolatyn is-shara. Bilikti jýrnalıster, bilimdi azamattar osy aýdıtorııada Sher-aǵanyń rýhyna taǵzym etip, úlken áser alsa eken degen oımen ashyp otyrmyz», dedi EUÝ rektory, akademık Erlan Sydyqov.
Is-shara barysynda Sher-aǵanyń izbasarlary Senat depýtaty Nurtóre Júsip, qoǵam qaıratkerleri Ýálıhan Qalıjanov, Darhan Myńbaı, qalamger Jarylqap Beısenbaıuly, Májilis depýtattary Qazybek Isa, Janarbek Áshimjan, «Qazaq gazetteri» seriktestiginiń dırektory, akademık Dıhan Qamzabekuly, «Habar» agenttigi basqarma tóraǵasy Kemelbek Oıshybaev jáne ózge de zııaly qaýym ókilderi tebirene sóz sóılep, Sherhan Murtazanyń qaıtalanbas tulǵa, kórnekti jazýshy, talantty pýblısıst, sheber aýdarmashy bolǵanyn atap ótti.
«Sherhan Murtaza temirqazyq retinde bizge úlgi bola bildi. Qaıratkerlik, qalamgerlik, jýrnalıstik jaǵynan alsaq ta, Sher-aǵanyń ómirlik jolyn jaqsy bilesizder. Ol kisiniń osynda qoıylǵan kitaptaryn, maqalalaryn oqyp, Parlamentte sóılegen sózderinen, ómir jolynan taǵylym alyp, Sher-aǵańsha jazyp, oı aıtýǵa umtylatyn qazaqtyń jas jýrnalısteriniń tolqyny kóptep shyǵa bersin», dedi Nurtóre Júsip.
Belgili qalamger, akademık Ýálıhan Qalıjanov Sherhan Murtaza redaktorlyq etken shaqta qazaq basylymynyń altyn dáýiri ornaǵanyn, gazettiń oqylymdy bolýyna, oqyrmandy kóbeıtýge ólsheýsiz úles qosqanyn atap ótti.
Dıhan Qamzabekuly «Egemenniń» shyn máninde egemen bolýyna Sherhan Murtaza qalyptastyrǵan myqty dástúrdiń áser etkenin basa aıtty. Sondaı-aq kórnekti jazýshy, jýrnalıst ári biregeı qoǵam qaıratkeri atyndaǵy aýdıtorııanyń ashylýyn – memlekettik mańyzy bar is ári kásibı kóregendiktiń kórinisi ekenin jetkizdi.
Bıyl 35 jyldyǵy atalynyp ótip jatqan «Ana tılı» gazetiniń tuńǵysh redaktory, túrkitanýshy Jarylqap Beısenbaıuly «Sherhan Murtaza men Seıdahmet Berdiqulov syndy ult jýrnalıstıkasyndaǵy dara tulǵalar atyndaǵy aýdıtorııanyń qatar ornalasýy bárimizdi qýantyp otyr. Rasynda, bardy baǵalaý men qalam darabozdaryn qadirleý – eldik boryshymyz» dedi.
Ýnıversıtettiń jýrnalıstıka jáne áleýmettik ǵylymdar fakýltetinde ashylǵan bul aýdıtorııa zamanaýı tehnıkamen jabdyqtalǵan. Buǵan Jambyl oblysynyń ákimdigi tikeleı qoldaý bildiripti. Aýdıtorııa bolashaq jýrnalısterge bilim jáne zertteý alańy retinde qyzmet etpek. Munda jazýshynyń ómiri men shyǵarmashylyǵyna arnalǵan derekti ekspozısııalar, foto jáne beınematerıaldar, arhıvtik derekkózder qoıylǵan.