Saıası qýǵyn-súrgin jáne asharshylyq qurbandaryn eske alý kúnine oraı Kegen aýdany Toǵyzbulaq aýylynyń mádenıet úıinde mazmuny tereń taǵylymdyq kesh ótti, dep jazady Egemen.kz.
Keshke Kegen aýdanynyń ákimi Nurbaqyt Teńizbaev, ónertanýshy, ǵalym-ustaz, fılologııa ǵylymdarynyń kandıdaty Saǵatbek Medeýbekuly, Parlament Májilisiniń depýtaty Janarbek Sadyhanuly jáne sharanyń negizgi arqaýyna aınalǵan saıası qaıratker, bilikti ustaz, talantty sazger Qapez Baıǵabyluly týraly derekti fılm túsirip, jaryqqa shyǵarǵan jýrnalıst Saltanat Bakeeva men Jalaǵash aýyldyq okrýginiń ákimi Aıgúl Sadyrova qatysty.
Aspantaý aıasyndaǵy eske alý kesh – halqymyzdyń tarıhyndaǵy zobalań jyldardyń qurbanyna aınalyp, qýǵyn-súrginge ushyraǵan mıllıondaǵan jazyqsyq jandardyń rýhyna baǵyshtaldy. Shara barysynda «Ultyn súıgen uly tulǵa – Qapez» atty derekti fılmniń tusaýy kesilip, kóziqaraq kórermenge jol tartty.
«Bul – birtýar tulǵa Qapez Baıǵabylulynyń ómirine arnalǵan alǵashqy derekti fılm. Ol kisiniń ómiri men qaıratkerlik joly, taǵdyrly kezeńi keńinen kórsetiledi. Búgingi urpaq Qapez ánderin tushyna tyńdaımyz, biraq sol ánderdiń shyǵý tarıhy jaıly, kim jınaqtap, zerttep-zerdelegeni, notaǵa túsirip, qazynany halyqqa kim usynǵany jaıly bile bermeımiz, sondyqtan osy taqyryptar qamtylady. Fılmde tek tarıhı derekter emes, Qapez atamyzdyń azamattyq beınesi, urpaqqa qaldyrǵan ósıeti, murasy óner zertteýshileriniń, urpaqtarynyń dáleldi dáıegimen kórsetiledi. Bul kúnde Qapez Baıǵabylulynyń 93 jastaǵy qyzy Shóke apamyz, nemere, shóbereleri bar. Derekti fılmdi túsirý barysynda baıqaǵanym, áli de bolsa arhıv qujattarynyń jetkiliksizdigi. Ultyn súıgen uly tulǵaǵa qatysty derekter arhıv qoınaýynan tolyq ashylmaǵan. Osy olqylyqtyń ornyn toltyrý úshin tarıhshylardyń eren eńbekteri qajet», deıdi derekti fılm avtory Saltanat Bakeeva.
Esimi elge keńinen tanymal qaıratker-aǵartýshy, halqynyń bolashaǵyna qyzmet etken Qapez Baıǵabyluly ózi týyp-ósken óńirdiń bilim-ilimine súbeli úles qosqan qaıratker. Sondaı-aq ol, aǵartýshy ǵana emes, jyrshy, aqyn, sazgerligimen tanylǵan tulǵa. Onyń tereńnen tolǵaıtyn «Merki», «Aıhaı», «Dúnıe-aý», «Qoshtasý» ánderi ár júrektiń túkpirinde terbelýde.
Almaty oblysy