QR Parlamentiniń Májilisi Ata Zańnyń 30 jyldyǵyna oraı sottalǵandardyń belgili bir sanatyna raqymshylyq jasaý týraly zań jobasyn qabyldady. Bul zań sottalǵan azamattardyń belgili bir sanatyna jazany jeńildetýge nemese tolyǵymen bosatýǵa múmkindik beredi, dep habarlaıdy Egemen.kz.
Májilis depýtaty Abzal Quspannyń aıtýynsha, bastamanyń maqsaty — qoǵamǵa qaýip tóndirmeıtin adamdarǵa gýmanızm kórsetý.
Depýtat raqymshylyqtyń eń aldymen osal toptarǵa baǵyttalatynyn túsindirdi. Onyń ishinde zeınetkerlerge, kámeletke tolmaǵandarǵa, balalardy jalǵyz tárbıelep otyrǵan áıelder men er adamdarǵa jáne basqa da erekshe jaǵdaıdaǵy azamattarǵa jasalady.
Ekonomıkalyq qylmys jasaǵandarǵa qatysty jaǵdaı da qarastyrylǵan. Eger qylmys saldarynan keltirilgen zalal tolyǵymen ótelse, urlyq pen alaıaqtyq sııaqty ister boıynsha da raqymshylyq jasalýy múmkin.
Zań jobasyn Májilistiń Zańnama jáne sot-quqyqtyq reforma komıtetiniń múshesi Snejanna Imasheva da qoldady. Onyń aıtýynsha, bul — qylmystyq saıasatty izgilendirý jáne raqymshylyqty keńinen qoldaný arqyly qoǵamdaǵy oń ózgeristerge qol jetkizýge baǵyttalǵan qadam.
2025 jyldyń qańtarynda depýtat Qaraqat Ábden sottalǵan áıelderge raqymshylyq jasaý usynysyn bergen edi. Bul bastama Ishki ister mınıstrliginiń qoldaýyna ıe boldy. Mınıstrlik málimetinshe, Qazaqstanda qazir qylmys jasaǵan kóptegen áıelder jazasyn ótep jatyr jáne olardyń kópshiligi osy jańa zań aıasynda raqymshylyqqa iligýi yqtımal.
Depýtattardyń pikirinshe osy zań jobasynyń qabyldanýy sottalǵandardyń ómirine oń áser etip qana qoımaı, olardyń qoǵamǵa qaıta beıimdelip, áleýmettik belsendi azamatqa aınalýyna múmkindik beredi.
Janel TО́LEÝBEKOVA, EUÝ stýdenti