Aımaq oqýshylary halyqaralyq jáne respýblıkalyq zııatkerlik baıqaýlarda 70-ten astam júlde ıelendi, dep jazady Egemen.kz.
Taldyqorǵan qalasyndaǵy Oqýshylar saraıynda halyqaralyq jáne respýblıkalyq zııatkerlik baıqaýlardyń jeńimpazdary men júldegerleri atanǵan mektepter men lıseılerdiń oqýshylaryn marapattaý saltanaty ótti.
Saltanatty sharany daryndy balalar men talantty jastardy qoldaýda eleýli úles qosyp kele jatqan oblystyq bilim basqarmasy men «Jetisý daryny» óńirlik oqý-ádistemelik ortalyǵy uıymdastyrdy. Sharaǵa Jetisý oblysy ákiminiń orynbasary Marlen Kólbaev qatysyp, quttyqtaý sóz sóıledi. Ol óz sózinde Jetisý oqýshylary halyqaralyq bilim saıystarynda bes altyn, bir kúmis jáne eki qola medal, al respýblıkalyq pán olımpıadalarynda segiz altyn, on alty kúmis jáne otyz toǵyz qola medal jeńip alǵanyn atap ótti.
Halyqaralyq jáne respýblıkalyq ǵylymı joba baıqaýlary men jalpy bilim beretin pánder boıynsha respýblıkalyq olımpıada jeńimpazdary men júldegerleri oblys ákiminiń atynan aqshalaı sertıfıkattarmen jáne gramotalarmen marapattaldy. Saltanatty jıynda júzge jýyq oqýshy atap ótildi.
О́ńirdiń eń úzdik olımpıadalyq komandasy retinde Alakól aýdanynyń Jylandy aýylyndaǵy daryndy balalarǵa arnalǵan lıseı-ınternattyń «Water 7» komandasy tanyldy. Bul komanda mamyr aıynda Shanhaıda ótken halyqaralyq robototehnıka baıqaýynda «Connect Award» kýbogyn jeńip alǵan bolatyn. Al «Olımp shyńyna jeteleýshi» nomınasııasymen Taldyqorǵan qalasyndaǵy №24 daryndy balalarǵa arnalǵan mamandandyrylǵan lıseı úzdik oqý orny retinde tanylyp, qomaqty aqshalaı syılyqqa ıe boldy.
Marapattalǵandardyń ishindegi eń jas daryn ıeleriniń biri — Eskeldi aýdanyndaǵy German Tıtov atyndaǵy mekteptiń 2-synyp oqýshysy Ǵalymbek Aıbekuly boldy.
— Men 2-4 synyp oqýshylary arasynda ótken matematıka olımpıadasyna qatysyp, 2-oryn aldym. Maǵan óte unady. Ustazym Tatygúl apaıǵa jáne ata-anama úlken alǵysymdy bildiremin, — deıdi jas matematık.
Respýblıkalyq geografııa olımpıadasynda úshinshi oryn alǵan Erhat Taqatbek te óz áserimen bólisti:
— Ashyq aıtqanda, kartalarmen jumys isteý, qosymsha ádebıetterdi izdeý, kezekti, ońaı emes kezeńderden ótý – bári ońaı bolǵan joq. Biraq tabandylyq pen muǵalimder men tálimgerlerdiń emosıonaldyq ári psıhologııalyq qoldaýynyń arqasynda bári múmkin boldy, — deıdi Erhat.
Uıymdastyrýshylardyń aıtýynsha, mundaı marapattaý rásimderi oqýshylardy zııatkerlik olımpıadalar men baıqaýlarǵa qatysýǵa yntalandyrýǵa baǵyttalǵan.